კობახიძე: ოპონენტების პიარკამპანია შავ პიარსა და პროვოკაციებზეა აგებული

ქართული ოცნება - დემოკრატიული საქართველოს ცენტრალურ ოფისში პარტიის აღმასრულებელმა მდივანმა, ირაკლი კობახიძემ ბრიფინგი გამართა, რომელზეც დღეს, ბათუმში ამომრჩეველთან სალომე ზურაბიშვილის შეხვედრაზე მომხდარი ინციდენტის შესახებ გააკეთა განცხადება.

ირაკლი კობახიძის შეფასებით, ოპონენტები წარმართავენ ისეთ საარჩევნო კამპანიას, რომელიც შავ პიარზე, დეზინფორმაციაზე, პიროვნულ შეურაცხყოფასა და პროვოკაციებზეა აგებული. კობახიძის თქმით, ამის მიზანია ხელოვნურად დესტაბილიზაციის გამოწვევა:

"განსაკუთრებით სამწუხაროა, რომ ასეთ ფონზე აირჩევა საქართველოს პრეზიდენტი, რომელიც უნდა გახდეს პოლიტიკურად ნეიტრალური თანამდებობის პირი, რომელიც არ უნდა ემსახურებოდეს არც ერთი პოლიტიკური პარტიის სუბიექტურ ინტერესებს. ამ ერთ-ერთი მთავარი პლატფორმაა „ნაციონალური მოძრაობის“ პარტიული მედია", - განაცხადა კობახიძემ.

კობახიძის თქმით, ქართულმა ოცნებამ დილიდანვე ჩააყენა დიპლომატიური კორპუსი და სადამკვირვებლო მისიები საქმის კურსში იმ სავარაუდო პროვოკაციების შესახებ, რომელიც სალომე ზურაბიშვილსა და ამომრჩეველს შორის შეხვედრაზე შეიძლებოდა მომხდარიყო. 

პარლამენტის თავმჯდომარემ ასევე განაცხადა, რომ ნაიცონალური მოძრაობის სტილია გაყალბებული სიები, რომლის ცესკოში წარდგენაც სისხლის სამართლის დანაშაულია. 

"ეს არის „ნაცმოძრაობის“ სტილი, რომელიც ჩვენ განსაკუთრებულად კარგად გვახსვოს 2012 წლის არჩევნებიდან, ასევე 2016 და2017 წლების საარჩევნო კამპანიებიდან. მინდა, ყურადღება გავამახვილო კიდევ ერთ პრობლემაზე, ეს არის ფიქტიური ბლოკების პრობლემა, რაზეც ჩვენ არაერთხელ გვისაუბრია", - განაცხადა კობახიძემ.

ბათუმში, პრეზიდენტობის კანდიდატ სალომე ზურაბიშვილთან შეხვედრაზე მცირე ინციდენტი მოხდა.  პრეზიდენტობის კანდიდატს სიტყვით გამოსვლის დროს დარბაზიდან ერთ-ერთმა მოქალაქემ განაცხადა: „თქვენ არ ხართ პრეზიდენტობის ღირსი და არ შეიძლება, გახდეთ საქართველოს პრეზიდენტი”. ამ შეძახილის შემდეგ მოქალაქე დარბაზიდან ზურაბიშვილის მხარდამჭერებმა გააძევეს.