ევროკომისიის წარმომადგენლები საქართველოში ორგანოთა გადანერგვის პროცესს შეაფასებენ

თბილისში ორგანოთა გადანერგვის შესახებ კონფერენცია გაიხსნა.

ევროკავშირთან ასოცირების ხელშეკრულების ფარგლებში, ტრანსპლანტოლოგიის მიმართულებით ევროდირექტივების იმპლემენტაციის მიზნით, საქართველოს ევროკომისიის ტექნიკური მხარდაჭერისა და ინფორმაციის გაცვლის ინსტრუმენტის (TAIEX) მისია და ხორვატიის ტრანსპლანტაციის პროგრამის ნაციონალური კოორდინატორი, ევროსაბჭოს ექსპერტი, მირელა ბუსიკი ეწვივნენ.

ვიზიტი ითვალისწინებს ორგანოთა გადანერგვის მიმართულებით საქართველოში მოქმედი მარეგულირებელი გარემოს შეფასებას ევროდირექტივებთან თავსებადობის კუთხით და სამოქმედო გეგმის მომზადებას ევროდირექტივებთან შესაბამისი საკანონმდებლო ჩარჩოს შექმნისათვის.

კონფერენცია საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის მინისტრის პირველმა მოადგილემ ზაზა ბოხუამ გახსნა.

2014 წლის 27 ივნისს ხელი მოეწერა „ერთი მხრივ, საქართველოსა და მეორეს მხრივ, ევროკავშირს და ევროპის ატომური ენერგიის გაერთიანებას და მათ წევრ სახელმწიფოებს შორის ასოცირების შესახებ შეთანხმებას“, რომელიც რატიფიცირებულია საქართველოს პარლამენტის მიერ 2014 წლის 18 ივლისს. 
ასოცირების შესახებ შეთანხმებით გათვალისწინებულია მთელი რიგი დირექტივების იმპლემენტაცია საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის სამინისტროს კომპეტენციას მიკუთვნებულ სფეროებში. 

კონფერენცია 5-დღიანია და მასში ჯანდაცვის სამინისტროს და სამედიცინო სფეროს წარმომადგენლები მონაწილეობენ.