ბახტაძე: საგადასახადო საკითხებთან მედიის თავისუფლების დაკავშირება უპასუხისმგებლობაა

პრემიერმინისტრმა მამუკა ბახტაძემ მთავრობის სხდომის დაწყებამდე გამართულ ბრიფინგზე ჟურნალისტების შეკითხვებსაც უპასუხა. მას კიდევ ერთხელ ჰკითხეს "ომეგა ჯგუფის" საქმესთან დაკავშირებით. ბახტაძის განცხადებით, საგადასახადო საკითხებთან მედიის თავისუფლების დაკავშირება "სრული უპასუხისმგებლობაა".

მამუკა ბახტაძის განცხადებით, "ომეგა ჯგუფმა", რომლის საქმეც თამბაქოს წარმოებას ეხება, გადასახადები ისევე უნდა გადაიხადოს, როგორც ნებისმიერმა ეკონომიკურმა აგენტმა. ამასთან, პრემიერმა თქვა, რომ სპორტის ყოფილ მინისტრს ლევან ყიფიანს, რომელიც "ომეგა ჯგუფის" შესახებ აუდიოჩანაწერების ერთ-ერთი ფიგურანტია, "ომეგა ჯგუფის" საკითხზე არასდროს შეხვედრია.

ბახტაძემ კიდევ ერთხელ განმარტა ის თუ რატომ დაუგროვდა ომეგას ამ რაოდენობით ვალი.

"მეგობრული მიდგომა არის ნებისმიერი ქართველი დამსაქმებლის მიმართ. ვერ ნახავთ საქართველოში მეწარმეს, რომლის მიმართაც შემოსავლების სამსახური ახორციელებს ისეთ პოლიტიკას, რომ არ ეძლევა მეწარმეს საშუალება, დაფაროს გარკვეული გრაფიკით ან ვადით ესა თუ ის საგადასახადო დავალიანება ისე, რომ არ შეუქმნას პრობლემები სამუშაო ადგილებს. ჩვენთვის უმთავრესი ამოსავალი წერტილი ნებისმიერი გადაწყვეტილების მიღებაში არის სამუშაო ადგილების შენარჩუნება ან მისი ზრდა", – განაცხადა მამუკა ბახტაძემ.

ლევან ყიფიანმა 2 ოქტომბერს პროკურატურისთვის ჩვენების მიცემაზე უარი თქვა.

პირველი ჩანაწერი რამდენიმე კვირის წინ "იბერიას" ეთერში გამოქვეყნდა, რომლის მფლობელიც "ომეგა ჯგუფია". არხი ამტკიცებს, რომ ხელისუფლება „ომეგას“ ბიზნესზე ზეწოლით მას ავიწროებს და „თავისუფალი სიტყვის ჩახშობა სურს“. ფინანსთა მინისტრმა ბრალდებები უარყო და განაცხადა, რომ „ომეგა ჯგუფს“ 51 მილიონ ლარზე მეტი საგადასახადო დავალიანება აქვს და სახელმწიფოსგან შეღავათიანი რეჟიმის დაწესების მიუხედავად ვალის გადახდა არ სურს, ტელევიზიას კი შანტაჟისთვის იყენებს.   

„ომეგა ჯგუფთან“ დაკავშირებული სავარაუდო კორუფციული სკანდალის ფარული ჩანაწერის ერთ-ერთი ფიგურანტია კონკურენციის სააგენტოს ხელმძღვანელი ნოდარ ხადური. ის ჩანაწერს ცრუს უწოდებს და „ომეგას“ საქმესთან კავშირს კატეგორიულად უარყოფს.

პატივისა და ღირსების შელახვისთვის სამართლებრივ დავას აპირებს ეკონომიკის ყოფილი მინისტრი დიმიტრი ქუმსიშვილი.

"იბერიისა" და "ომეგა ჯგუფის" თემას 12 სექტემბერს პრემიერმინისტრი მამუკა ბახტაძე გამოეხმაურა და განაცხადა, რომ ფინანსთა სამინისტრო და შემოსავლების სამსახური სანქციების დაწესებისგან მაქსიმალურად ცდილობდა თავის შეკავებას. ბახტაძის თქმით, უწყებებმა კომპანია 11-ჯერ გააფრთხილეს, თუმცა ამის შემდეგ ვალი კიდევ უფრო გაიზარდა.

14 სექტემბერს სპორტის ყოფილმა მინისტრმა ლევან ყიფიანმა „საქართველოს რკინიგზის“ სამეთვალყურეო საბჭოს წევრის პოზიცია დატოვა. 17 სექტემბერს კი ის პროკურატურაში გამოკითხეს.