კობახიძე: პარლამენტში გახარიას და თადუმაძის დაბარების საჭიროებას ვერ ვხედავ

"ევროპული საქართველო" საკანონმდებლო ორგანოში შსს მინისტრს გიორგი გახარიასა და მთავარ პროკურორ შალვა თადუმაძეს იბარებს. პარლამენტის თავმჯდომარე კი ფიქრობს, რომ მათი დაბარების საფუძველი არ არსებობს. 

„იმ პირობებში, როდესაც არათუ საფუძვლიანი ეჭვი, უსაფუძვლო ეჭვის საფუძველიც კი არ არსებობს ამ ეტაპზე, აქედან გამომდინარე, მე პირადად თუ მკითხავთ, ვერ ვხედავ, ნამდვილად, ამ ეტაპზე ვერავის დაბარების საჭიროებას“, - თქვა პარლამენტის თავმჯდომარე ირაკლი კობახიძემ. კობახიძის შეფასებით, მტკიცებით ფორმაში საუბარი არასწორია.

რაც შეეხება კონკრეტულად ამ საქმეს, მტკიცებითი ფორმით არ გირჩევთ საუბარს, და მით უმეტეს, არ გირჩევთ ისეთი ბრალდებების წამოყენებას, რომელსაც თქვენ აყენებთ. ეს ყველაფერი ჩავაბარეთ ჩვენ 2012 წელს. ბიურო არ არის ამის ადგილი. ბიურო არ არის ამის განხილვის ადგილი. რაზეც თქვენ საუბრობთ, ტოტალური კორუფცია, სისტემური კორუფცია, ელიტური კორუფცია, ძალადობა და ასე შემდეგ, ეს არის 2012 წლამდე ხელისუფლების ხელწერა და ეს ჩვენ ჩავაბარეთ წარსულს“, - განაცხადა პარლამენტის თავმჯდომარემ.

მისივე თქმით, გამოძიება დაწყებულია და შესაბამისი პირები დაბარებულები არიან.

ბიუროს სხდომაზე, პარლამენტის თავმჯდომარე გამოეხმაურა უმცირესობის წევრთა კიდევ ერთ განცხადებასაც, რომელიც ხორავას ქუჩის საქმეზე შექმნილ საგამოძიებო კომისიის დასკვნაში ასახული რეკომენდაციების შესრულებასთან დაკავშირებით, პარლამენტში შსს მინისტრისა და მთავარი პროკურორის დაბარებას ეხებოდა.

„აბსოლუტურად გახსნილი იყო როგორც ერთი, ისე მეორე ორგანო. ისინი მოდიოდნენ საგამოძიებო კომისიის ფარგლებში და აბსოლუტურად ყველა კითხვაზე გაგცეს პასუხი... იქაც მტკიცებითი ფორმით საუბარი იმაზე, რომ ვიღაც დანაშაულის მონაწილეა, ფაქტობრივად, ახლა თქვენ დანაშაული დააბრალეთ კონკრეტულ პირებს, თან არასრულწლოვანს. როდესაც ასე ამბობთ, რომ იქ არის ჯგუფურ დანაშაულში მონაწილე პირი, მაშინ თქვით, რომ ჩვენი ეჭვის საფუძველზე.

რაც შეეხება საგამოძიებო კომისიის საქმეს, არავის არ აქვს არც მოსვლის პრობლემა, არც კითხვებზე პასუხის გაცემის პრობლემა და ეს მოხდა საგამოძიებო კომისიის ფარგლებში და იგივე მოხდება ახლაც. და მიზეზი ზუსტად ის არის, რომ დასამალი აქ არაფერი არ არის და ყველაფერი ნათელია, ყველაფერი არის ცხადი. არავის არავისთვის ხელი არ დაუფარებია და საბოლოო ჯამში, ამ დასკვნამდე მივიდა, რეალურად, კომისიაც, ოღონდ სხვანაირად წერია და მესმის აბსოლუტურად პოლიტიკური კონიუქტიურიდან გამომდინარე, რომ სხვანაირი დასკვნა თქვენგან ვერ დაიდებოდა, მით უმეტეს, ამ სარჩევნო პროცესში, მაგრამ კიდევ ერთხელ გავიმეორებ, რაც არაერთხელ მითქვამს, რომ საბოლოო შედეგი, ნიუანსებს თუ არ ჩავთვლით, თქვენი კომისიის მუშაობის და საგამოძიებო ორგანოების მუშაობის, იყო ერთი და იგივე", - განაცხადა ირაკლი კობახიძემ.