„ომეგა ჯგუფის“ საქმეზე ევროპული საქართველო გახარიასა და თადუმაძეს პარლამენტში იბარებს

საპარლამენტო უმცირესობა საკანონმდებლო ორგანოში შს მინისტრ გიორგი გახარიასა და მთავარ პროკურორ შალვა თადუმაძეს იბარებს. „ევროპული საქართველოს“ წარმომადგენელთა აზრით, სწორედ მათ უნდა გასცენ პასუხები „ომეგა ჯგუფთან“ დაკავშირებულ შეკითხვებს, მათ შორის იმის თაობაზე, თუ რა ეტაპზეა გამოძიება. ინფორმაციას 1tv ავრცელებს.

„პარლამენტში პასუხი უნდა გაეცეს შეკითხვებს, რომელიც საზოგადოებას აქვს. შინაგან საქმეთა მინისტრსა და მთავარ პროკურორს ევალებათ მობრძანდნენ პარლამენტში და გასცენ პასუხი კითხვებს, რა ეტაპზეა გამოძიება, რა საგამოძიებო მოქმედებები ტარდება, რათა რაც შეიძლება სწრაფად დაიწყოს იმ პირების სისხლის სამართლებრივი დევნა, ვინც ჩართულნი იყვნენ დანაშაულებრივ საქმეებში. საუბარი ლოდინზე, რომ ავთენტურობა დადგინდეს, არის დროის გაწელვა და პოლიტიკური ფანდი”, - განაცხადა „ევროპული საქართველოს“ წევრმა, ირაკლი აბესაძემ.

მამუკა ბახტაძის განცხადებით, "ომეგა ჯგუფმა", რომლის საქმეც თამბაქოს წარმოებას ეხება, გადასახადები ისევე უნდა გადაიხადოს, როგორც ნებისმიერმა ეკონომიკურმა აგენტმა. ამასთან, პრემიერმა თქვა, რომ სპორტის ყოფილ მინისტრს ლევან ყიფიანს, რომელიც "ომეგა ჯგუფის" შესახებ აუდიოჩანაწერების ერთ-ერთი ფიგურანტია, "ომეგა ჯგუფის" საკითხზე არასდროს შეხვედრია.

ლევან ყიფიანმა 2 ოქტომბერს პროკურატურისთვის ჩვენების მიცემაზე უარი თქვა.

პირველი ჩანაწერი რამდენიმე კვირის წინ "იბერიას" ეთერში გამოქვეყნდა, რომლის მფლობელიც "ომეგა ჯგუფია". არხი ამტკიცებს, რომ ხელისუფლება „ომეგას“ ბიზნესზე ზეწოლით მას ავიწროებს და „თავისუფალი სიტყვის ჩახშობა სურს“. ფინანსთა მინისტრმა ბრალდებები უარყო და განაცხადა, რომ „ომეგა ჯგუფს“ 51 მილიონ ლარზე მეტი საგადასახადო დავალიანება აქვს და სახელმწიფოსგან შეღავათიანი რეჟიმის დაწესების მიუხედავად, ვალის გადახდა არ სურს, ტელევიზიას კი შანტაჟისთვის იყენებს.   

„ომეგა ჯგუფთან“ დაკავშირებული სავარაუდო კორუფციული სკანდალის ფარული ჩანაწერის ერთ-ერთი ფიგურანტია კონკურენციის სააგენტოს ხელმძღვანელი ნოდარ ხადური. ის ჩანაწერს ცრუს უწოდებს და „ომეგას“ საქმესთან კავშირს კატეგორიულად უარყოფს.

პატივისა და ღირსების შელახვისთვის სამართლებრივ დავას აპირებს ეკონომიკის ყოფილი მინისტრი დიმიტრი ქუმსიშვილი.

"იბერიისა" და "ომეგა ჯგუფის" თემას 12 სექტემბერს პრემიერმინისტრი მამუკა ბახტაძე გამოეხმაურა და განაცხადა, რომ ფინანსთა სამინისტრო და შემოსავლების სამსახური სანქციების დაწესებისგან მაქსიმალურად ცდილობდა თავის შეკავებას. ბახტაძის თქმით, უწყებებმა კომპანია 11-ჯერ გააფრთხილეს, თუმცა ამის შემდეგ ვალი კიდევ უფრო გაიზარდა.

14 სექტემბერს სპორტის ყოფილმა მინისტრმა ლევან ყიფიანმა „საქართველოს რკინიგზის“ სამეთვალყურეო საბჭოს წევრის პოზიცია დატოვა. 17 სექტემბერს კი ის პროკურატურაში გამოკითხეს.