თალაკვაძე დამკვირვებლებს ცხინვალში მაია ოთინაშვილის შესაძლო ცემის შესახებ ინფორმაციის გადამოწმებას სთხოვს

სახალხო დამცველმა ნინო ლომჯარიამ ცოტა ხნის წინ, ოკუპანტების მიერ 37 წლის მაია ოთინაშვილის გატაცებასთან დაკავშირებით ახალი ინფორმაცია გაავრცელა. ლომჯარია ოთინაშვილის ოჯახზე დარყდნობით ამბობს, რომ ოკუპანტების მიერ უკანონო დაკავებული ქალი ნაცემია.

ამ ინფორმაციასთან დაკავშირებით საპარლამენტო უმრავლესობის ლიდერი არჩილ თალაკვაძე დამოუკიდებელ დამკვირვებლებს, საერთაშორისო ორგანიზაციებს მიმართავს, რომ დროულად გადაამოწმონ ეს ინფორმაცია.

"ომბუდსმენისგან მივიღეთ შემაშფოთებელი ინფორმაცია, რომ სავარაუდოდ მაია ოთინაშვილის მიმართ მოხდა ძალადობა და არასათანადო მოპყრობა. ახლა გვჭირდება ერთიანობა და აქტიური მოქმედება, რომ საოკუპაციო რეჟიმის მიერ გატაცებული ჩვენი თანამოქალაქის უსაფრთხოება იყოს დაცული. მივმართავთ დამოუკიდებელ დამკვირვებლებს, საერთაშორისო ორგანიზაციებს დროულად გადაამოწმონ მაია ოთინაშვილის მდგომარეობა. ჩვენის მხრივ როგორც ოფიციალურ ფორმატებში, ასევე საერთაშორისო პარტნიორებთან ვმუშაობთ, რომ რეაგირება იყოს დროული და მაია ოთინაშვილი ოჯახს დაუყოვნებლივ დაუბრუნდეს. გატაცების ეს ფაქტი კიდევ ერთხელ ადასტურებს, თუ რა მძიმე ვითარებაა ოკუპირებულ რეგიონებში, რაზეც პასუხისმგებლობა საოკუპაციო რეჟიმს და რუსეთის ფედერაციას ეკისრება", -განაცხადა არჩილ თალაკვაძემ.

ცხელი ხაზით მიღებული ბოლო ინფორმაციის თანახმად, ცხინვალში უკანონოდ დაკავებულ მაია ოთინაშვილს დე ფაქტო პროკურატურამ არა 2-თვიანი, არამედ 10-დღიანი ე.წ. წინასწარი პატიმრობა შეუფარდა. აღსანიშნავია, რომ მაია ოთინაშვილი ხურვალეთიდან უკვე მე-5 დაკავებული ქალია.

მთავრობის სხდომაზე პრემიერმინისტრმა მამუკა ბახტაძემ თქვა, რომ მობილიზებულია ყველა, რათა მაია ოთინაშვილი დროულად დაუბრუნდეს ოჯახს.

37 წლის მაია ოთინაშვილი ოკუპანტებმა გამყოფი ზოლის მიმდებარე სოფელ ახალი ხურვალეთიდან 29 სექტემბერს გაიტაცეს. ოთხი დღის განმავლობაში მის შესახებ ინფორმაცია ცნობილი არ იყო. ანალიტიკოსების შეფასებით, ეს არის რუსეთის მორიგი პროვოკაცია. რადგან კრემლი გაეროში საქართველოს პრემიერმინისტრის გამოსვლამ გააღიზიანა.

27 სექტემბერს, მამუკა ბახტაძე გენერალური ასამბლეის 73-ე სესიაზე სიტყვით ქართულ ენაზე გამოვიდა. მან რუსეთს ტრიბუნიდან ნაკისრი ვალდებულების შესრულებისა და საქართველოდან ჯარის გაყვანისკენ მოუწოდა.

საქართველოს პრემიერმინისტრის, მამუკა ბახტაძის გამოსვლას ცხინვალის დეფაქტო რეჟიმი და აფხაზეთის დეფაქტო საგარეო საქმეთა მინისტრი დაურ კოვე, ასევე რუსეთის საგარეო საქმეთა სამინისტრო გამოეხმაურნენ.

რუსეთის საგარეო საქმეთა სამინისტრო საქართველოს პრემიერმინისტრის გაეროს ასამბლეის 73-ე სესიაზე წარმოთქმულ სიტყვას კრიტიკულად შეხვდა.