დეფაქტო ცხინვალი და სოხუმი მამუკა ბახტაძის მიმართვას გამოეხმაურნენ

გაეროს გენერალური ასამბლეის 73-ე სესიაზე საქართველოს პრემიერმინისტრის, მამუკა ბახტაძის გამოსვლას ცხინვალის დეფაქტო რეჟიმი და აფხაზეთის დეფაქტო საგარეო საქმეთა მინისტრი დაურ კოვე ეხმიანებიან.

„მამუკა ბახტაძის განცხადებები იმის შესახებ, რომ სამხრეთ ოსეთის მოსახლეობის რაოდენობა სოციალურ-ეკონომიკური პრობლემების გამოა შემცირებული, ცინიკურად ჟღერს, რადგანაც ჩვენი მოსახლეობის შემცირების რეალური მიზეზი საქართველოს მიერ საუკუნის მანძილზე მოწყობილი ჯოჯოხეთი და გენოციდებია.

საქართველოს პრობლემა კი იმაშია, რომ საკუთარ ეკონომიკურ შესაძლებლობებსა და გეოპოლიტიკურ მნიშვნელობაზე გადაჭარბებული წარმოდგენა აქვთ. საქართველო პოსტსაბჭოთა სივრცეში ერთ-ერთი უღარიბესი ქვეყანაა, სადაც მოსახლეობის ცხოვრების პირობები დაბალია და კრიტიკული პრობლემებია ადამიანის უფლებების საკითხებშიც.

დამოუკიდებლობის 28 წლის განმავლობაში სამხრეთ ოსეთმა თავისი სიცოცხლისუნარიანობა დაამტკიცა და არანაირი ილუზია საქართველოსა და სამხრეთ ოსეთის ერთიანი მომავლის არ არსებობს,“-ნათქვამია განცხადებაში.

აფხაზეთის დეფაქტო საგარეო საქმეთა მინისტრი კი აცხდებს, რომ შეცდომაა, როცა საქართველოს პრემიერმინისტრი და მთავრობა აფხაზებს თანამოქალაქეებად თვლიან.

„მთავარი შეცდომა საქართველოს პრემიერმინისტრისა და ხელმძღვანელობის ის არის, რომ თანამოქალაქეებად გვთვლიან. ჩვენ ორი სხვადასხვა სახელმწიფოს მოქალაქეები ვართ, მეზობელი სახელმწიფოების და არა ერთი სახელმწიფოსი. შესაბამისად, ჩვენ შეგვიძლია გვქონდეს მხოლოდ ორი სახელმწიფოს მშვიდობიანი თანაცხოვრების გეგმა.

რაც შეეხება მის განცხადებებს ქართულ კლინიკებში ჩვენი მოქალაქეების უფასო მკურნალობის და ევროკავშირში უვიზოდ გადაადგილების შესახებ, ჩვენ ყოველთვის ერთ რამეს ვაცხადებდით: თუ ქართველებს ჩვენი კარგად ყოფნა სურთ, შეწყვიტონ აფხაზეთისა და სამხრეთ ოსეთის საერთაშორისო იზოლაცია და გადახედონ ოკუპირებული ტერიტორიების შესახებ კანონს, რომელიც ხელს გვიშლის საერთაშორისო ურთიერთობების განვითარებაში. მათი განცხადებები სხვა არაფერია, თუ არა პოპულიზმი,“-აღნიშნა კოვემ „რია ნოვოსტისთვის“ მიცემულ ინტერვიუში.

საქართველოს პრემიერმინისტრის გაეროს ასამბლეის 73-ე სესიაზე წარმოთქმულ სიტყვას კრიტიკულად შეხვდა რუსეთის საგარეო საქმეთა სამინისტრო.

მამუკა ბახტაძე გენერალური ასამბლეის 73-ე სესიაზე სიტყვით ქართულ ენაზე გამოვიდა. მან რუსეთს ტრიბუნიდან ნაკისრი ვალდებულების შესრულებისა და საქართველოდან ჯარის გაყვანისკენ მოუწოდა.

პრემიერმინისტრის სიტყვა დაახლოებით 20 წუთს გრძელდებოდა.