თბოსადგურ „გარდაბანი 2“-ის მშენებლობაზე დასაქმებულმა მუშებმა გაფიცვა შეწყვიტეს

თბოსადგურ „გარდაბანი 2“-ის მშენებლობაზე დასაქმებულმა მუშებმა გაფიცვა შეწვიტეს. მუშების განცხადებით, თბოსადგურის მშენებლობის მწარმოებელი ჩინური კომპანიის ხელმძღვანელობა მათი მოთხოვნების სრულად შესრულებას დასთანხმდა და ხვალიდან მუშაობას განაახლებენ. ინფორმაციას „ინტერპრესნიუსი“ ავრცელებს.

ჩინურ კომპანიასთან მოლაპარაკებებში, მუშებისგან შემდგარ საინიციატივო ჯგუფთან ერთად, ჩართული იყო გარდაბნის მუნიციპალიტეტის მერი და პარლამენტში გარდაბნის მაჟორიტარი დეპუტატი.

გარდაბნის მერის რამაზ ბუდაღაშვილის თქმით, კომპანია, როგორც სამუშაო პირობების გაუმჯობესებაზე ასევე, მუშებთან შრომითი ხელშეკრულებების გაფორმებაზე და ხელფასების გაზრდაზეც დათანხმდა. ამასთანავე, მუშებს სამუშაო ადგილზე მისასვლელად სპეციალურად გამოყოფილი ტრანსპორტიც მოემსახურებათ.

12 ოქტომბერს თბოსადგურ „გარდაბანი 2“-ის მშენებლობაზე დასაქმებულები სამუშაო პირობების გაუმჯობესების და ხელფასების გაზრდის მოთხოვნით გაიფიცნენ.

გაფიცვის გამო მშენებლობის პროცესი ნაწილობრივ პარალიზებული იყო, ადგილზე მხოლოდ ჩინეთიდან ჩამოყვანილი თანამშრომლები მუშაობდნენ.