საქართველოს მოქალაქე თურქ მებაჟეს ფიზიკურ ძალადობაში ადანაშაულებს

საქართველოს მოქალაქე ნათია შავაძე სარფის საბაჟოზე თურქი მებაჟეების მხრიდან სავარაუდო ფიზიკური ძალადობის ფაქტის შესახებ Facebook-ზე წერს. ნათია შავაძის თქმით, თურქმა მებაჟემ მას პასპორტი სახეში ესროლა, რაზეც შავაძეს შესაბამისი რეაქცია ჰქონდა. ამის შემდეგ, როგორც შავაძე ამბობს, ხუთი თურქი მებაჟე მისთვის პასპორტის წართმევას ცდილობდა. 

"ეს არის თურქი მესაზღვრის ნევროზის გამოვლინება ჩემს პასპორტში! ტიპმა ეს გააკეთა იმიტომ, რომ ბეჭედდასმული პასპორტი ფანჯრიდან მესროლა და მე შესაბამისი რეაქცია მქონდა სახეზე. მერე ხუთი მესაზღვრე ცდილობდა წაერთმია პასპორტი,თან მაჯებზე შემაფრინდა ერთი. კითხვაზე, (ინგლისურად) რა დარღვევის მთხოვდნენ პასპორტს უკან, პასუხად ბოლო ხმაზე გაჰკიოდნენ მუქარებს მშობლიურ ენაზე. ბოლოს მივაწოდე პასპორტი და ნერვოზულად ააჭრელა დოკუმენტი. გასაგებია, რომ წითელი ხალიჩის დაგების ვალდებულება არ აქვთ მესაზღვრეებს , მაგრამ რა უფლება აქვს სახეში მესროლოს პასპორტი და მერე ხელები მიგრიხოს? შემიძლია რაიმე გავაკეთო ამ ნაგვის წინააღმდეგ?'', - წერს ნათია შავაძე Facebook-ზე. 

"აჭარის ტელევიზიის" ცნობით, ეს პირველი შემთხვევა არ არის, როდესაც საქართველოს მოქალაქეები თურქ მებაჟეებს ძალადობაში ადანაშაულებენ.

მომხდართან დაკავშირებით განცხადება თურქეთის საკონსულომაც გაავრცელა, რომელშიც წერს, რომ საკითხთან დაკავშირებული მოქალაქემ საკონსულოს უნდა მიმართოს, შემდეგ კი საკითხს თურქეთის კომპეტენტური ორგანოები განიხილავენ. 

"ქალბატონის მოთხოვნის საფუძვლიანობის შესწავლისა და თავიანთი სიმართლის დამტკიცების შემთხვევაში, საჭირო ზომების გასატარებლად, დაინტერესებულმა პირმა უნდა მოგვმართოს განცხადებით, სადაც მითითებული უნდა იქნას ინციდენტის დრო და ადგილი. აღნიშნულ საკითხთან დაკავშირებული ნებისმიერი განაცხადი გადაეცემა თურქეთის კომპეტენტურ ორგანოებს და მთელი სერიოზულობით განიხილება. სასაზღვრო გამშვები პუნქტის ბევრ ადგილას ვიდეო კამერების საშუალებით მონიტორინგი ხორციელდება და ჩანაწერების მეშვეობითაც ხდება ამ პრეტენზიის შესწავლა'', - წერია თურქეთის საკონსულოს განცხადებაში.