უცხოელებისთვის ბინადრობის მინიჭების გამკაცრების მოთხოვნით პარლამენტში ხელმოწერები შეიტანეს

მოქალაქეთა სამართლებრივი მდგომარეობის შესახებ კანონში ცვლილებების მოთხოვნით საინიციატივო ჯგუფის წევრებმა პარლამენტს მიმართეს. მათ 35 000-მდე ხელმოწერა შეაგროვეს და მოითხოვენ არსებული რეგულაციები გადაიხედოს.

"უცხო ქვეყნის მოქალაქეებისთვის მოქალაქეობის მიყიდვა უნდა აიკრძალოს. არსებული კანონმდებლობით შესაძლებელია 35 000 დოლარად შეისყიდოს მოქალაქეობა უცხოელმა და დასაქმდეს კიდეც. ეს ეწინააღმდეგება ჩვენ რელიგიურ და კულტურულ ინტერესებს. თუ მექანიკური მინიჭება ჩვეულებად გადაიქცევა მკვიდრი მოსახლეობის რაოდენობა შემცირდება. ჩვენი ინიციატივის მიხედვით, მოქალაქეობის მექანიკური შესყიდვა იქნება აკრძალული და საინვესტიციო ბინადრობის საკითხთან დაკავშირებით გვაქვს ჩვენი პოზიცია: ესეც უნდა შეიცვალოს და ნახევარ მილიონიანი ინვესტიციის შემთხვევაში უნდა გაიცეს ბინადრობის ნებართვა და ამ პირს უნდა დაევალოს მხოლოდ ქართველების დასაქმება. რამდენი უნდა დაასაქმოს, კანონით უნდა განისაზღვროს", - განაცხადა დიმიტრი ლორთქიფანიძემ.

ინიციატივის ავტორები ამბობენ, რომ მათი პროექტი არ გულისხმობს სასწავლო ბინადრობის გამკაცრებას და უცხოელ სტუდენტებს უნდა ჰქონდეთ საქართველოში უმაღლესი საბაკალავრო, სამაგისტრო და სადოქტორო ცოდნის მიღების საშუალება, როგორც ეს ევროპის ქვეყნებშია მიღებული.

უცხოელებზე ბინადრობის ნებართვების გამკაცრების შესახებ კანონში შესატანი ცვლილებები მთავრობის სხდომაზე მაისში განიხილეს.

როგორც მმართველ გუნდში აცხადებდნენ, ცვლილების საფუძველზე კანონის არაკეთილსინდისიერად გამოყენება შეიზღუდება. ამასთან, საკანონმდებლო ცვლილების თანახმად, იცვლება შემდეგი რეგულაცია: საქართველოში მუდმივი ცხოვრების ნებართვის მოსაპოვებლად ბოლო 10 წლის განმავლობაში უნდა ცხოვრობდეს.

12 წლამდე იზრდება დროებითი ბინადრობის ნებართვის ვადა - დღეს მისი მაქსიმალური ხანგრძლივობა არის 6 წელი, ამასთან თუ უცხო ქვეყნის მოქალაქეს არ აქვს საქართველოში მუდმივად დარჩენის მოტივი, 6 წლის გასვლის შემდეგ, ის კვლავ მიიღებს დროებით და არა მუდმივ ნებართვას.

ამასთან, ცნობილია, რომ 3 წელში საქართველოში საინვესტიციო ბინადრობა 466-მა უცხოელმა მიიღო.