კობახიძე: ფაშისტს შეიძლება ბოლშევიკი სჯობდეს, ამაზე რბილად მესამე სექტორის რეაქციას ვერ შევაფასებთ

პარლამენტის თავმჯდომარე ირაკლი კობახიძე არასამთავრობო ორგანიზაციების მისამართით მის მიერ გაკეთებულ განცხადებაზე განმარტებას აკეთებს. რამდენიმე დღის წინ ირაკლი კობახიძემ მესამე სექტორი ნიკა გვარამიას მიერ სალომე ზურაბიშვილზე გამოთქმულ მოსაზრებებზე რეაქციის უქონლობის გამო გააკრიტიკა და ისინი ფაშიზმის მხარდაჭერაში დაადანაშაულა. ამ შეფასებას გუშინ პარტიის თავმჯდომარე ბიძინა ივანიშვილი გამოეხმაურა და თქვა, რომ კობახიძეს ასეთი განცხადება არ უნდა გაეკეთებინა.

"ჩვენ ვსაუბრობდით გვარამიას განცხადებაზე და ამასთან დაკავშირებით არასამთავრობოების რეაქციაზე. თუ ვდავობთ სიტყვებთან დაკავშირებით, ფაშისტს შეიძლება სჯობდეს ბოლშევიკი, მაგრამ ამაზე რბილი გამონათქვამით ვერ შევაფასებთ იმას, როდესაც ნიკა გვარამია ამბობს, რომ ადამიანები უნდა გავდევნოთ. ეს იყო, გნებავთ ბოლშევიკური განაცხადი და სამწუხაროა, რომ დღემდე ეს განცხადება არასამთავრობოებს არ შეუფასებიათ. ეს, რა თქმა უნდა, ჩვენ გვაძლევს იმაზე ფიქრის საშუალებას, რომ შესაძლოა მათ არ აქვთ ის მყარი ღირებულებები, რომელიც უნდა ჰქონდეს სამოქალაქო საზოგადოების წარმომადგენლებს", - განაცხადა ირაკლი კობახიძემ.

პარლამენტის ვიცესპიკერის თამარ ჩუგოშვილის თქმით, მთავარია, რომ მესამე სექტორის საქმიანობას ქვეყანაში პრობლემები არ შეექმნას.

"არასამთავრობო ორგანიზაციების კრიტიკის საფუძველი არის ის, რომ იყო კონკრეტული შეფასებები, რომელიც იმ გუნდის აზრით, რომელსაც მე წარმოვადგენ, არ იყო ობიქტური და მიუკერძოებელი და ამან გამოიწვია ეს საჯარო სიტყვიერი შეხლა-შემოხლა. მთავარი არის ის, რომ მათ საქმიანობას არ შეექმნას პრობლემა, თორე საჯარო სექტორში სიტყვიერად როგორ გამოვხატავთ აზრს, დავეთანხმებით თუ არა, ეს არის საჯარო სივრცეში ღიად მიმდინარე არჩევნები და ამას ნახავთ ყველა ქვეყანაში", - თქვა თამარ ჩუგოშვილმა. 

მესამე სექტორის წარმომადგენლები ხელისუფლების მხრიდან კრიტიკის ობიექტი არაერთხელ გახდნენ. ბოლოს არასამთავრობო ორგანიზაციები პარლამენტის თავმჯდომარემ ირაკლი კობახიძემ გააკრიტიკა. ივნისში კი არასამთავრობო სექტორი მინისტრის თეა წულუკიანის გადადგომას მოითხოვდა.

„საერთაშორისო გამჭვირვალობა - საქართველოს“ ხელმძღვანელი ეკა გიგაური იუსტიციის მინისტრმა ბოლოს დანიაში გამართულ ანტიკორუფციულ კონფერენციაზე გააკრიტიკა და მას მიკერძოებულობაში დასდო ბრალი, რასაც გიგაურის და მისი კოლეგების მხრიდან საპასუხო ბრალდებები მოჰყვა.