პრემიერი: ივანიშვილის მესიჯი მათთვის იყო, ვინც ზურაბიშვილის მხარდაჭერაში ჩამოყალიბებული არ არის

პრემიერმინისტრმა მამუკა ბახტაძემ მთავრობის სხდომის დაწყებამდე გამართულ ბრიფინგზე 28 ოქტომბრის საპრეზიდენტო არჩევნებთან და ბიძინა ივანიშვილის მიერ რამდენიმე დღის წინ მიცემულ სატელევიზიო ინტერვიუსთან დაკავშირებით გააკეთა განცხადება.

პრემიერმინისტრის განცხადებით, ივანიშვილის მესიჯი, რომელიც სალომე ზურაბიშვილის მხარდაჭერას შეეხებოდა, განკუთვნილი იყო ქართული ოცნების წევრებისთვის, რომლებიც "ჯერ კიდევ არ არიან ჩამოყალიბებული, რომ სალომე ზურაბიშვილის მხარდაჭერა მიზნებისა და ფასეულობების მხარდაჭერას ნიშნავს".

მამუკა ბახტაძემ დასძინა, რომ სალომე ზურაბიშვილს პარტიის მხრიდან სრული მხარდაჭერა აქვს. "არაერთხელ გავაკეთეთ განცხადება, რატომ ვუჭერთ მხარს თავისუფალ კანდიდატ სალომე ზურაბიშვილს", - თქვა პრემიერმა.

"ჩვენი პოლიტიკური ფილოსოფიის განუყოფელი ნაწილია ის მთავარი ამოცანა, რომელიც უნდა გადავჭრათ ქართველ ერთან ერთად. ეს გახლავთ საქართველოს შეუქცევადი ინტეგრაცია ევროპულ და ევროატლანტიკურ სტრუქტურებში. სწორედ ამ ამოცანებიდან, მიზნებიდან და ფილოსოფიიდან გამომდინარე მივიღეთ ეს გადაწყვეტილება. შესაბამისად, ბიძინა ივანიშვილის მესიჯიც ეკუთვნოდა იმ ადამიანებს, რომლებიც ჯერ კიდევ არ არიან ჩამოყალიბებული თავიანთ პოზიციაში, რომ სალომე ზურაბიშვილის მხარდაჭერა ნიშნავს ამ მიზნებისა და ფასეულობების მხარდაჭერას", - თქვა მამუკა ბახტაძემ.

პრემიერმინისტრმა საქართველოს მოქალაქეებს 28 ოქტომბრის საპრეზიდენტო არჩევნებში მონაწილეობისკენაც მოუწოდა.

„ქართული ოცნების“ თავმჯდომარე ბიძინა ივანიშვილი ფიქრობს, რომ საპრეზიდენტო არჩევნებზე მეორე ტური არ იქნება და დარწმუნებულია, რომ სალომე ზურაბიშვილი პირველივე ტურში გაიმარჯვებს. ამის შესახებ მან ტელეკომანიების „იმედის“, „პირველის“ და „რუსთავი 2“-ის წამყვანებთან ინტერვიუში განაცხადა.

ივანიშვილმა ოცნების მხარდამჭერების იმ ნაწილს მიმართა, რომელიც ვერ იზიარებს ზურაბიშვილის კანდიდატურას პრეზიდენტის პოსტზე და სთხოვა, მაინც მას დაუჭიროს მხარი.