ივანიშვილი ოქუაშვილზე: ბიზნესმენი ცდილობს დააშანტაჟოს ხელისუფლება, რაც არ გაუვა

"ქართული ოცნების“ თავმჯდომარე ბიძინა ივანიშვილმა ჟურნალისტებთან ინტერვიუს დროს "ომეგა ჯგუფის" საქმესა და ტელეკომპანია "იბერიაზე" ილაპარაკა.

ივანიშვილის ინფორმაციით, „ომეგა ჯგუფის“ დამფუძნებელი ზაზა ოქუაშვილი და ფინანსთა მინისტრი ივანე მაჭავარიანი შეხვედრაზე ერთმანეთს დაუპირისპირდნენ. როგორც ივანიშვილმა განაცხადა, მაჭავარიანი ვერ არწმუნებდა ოქუაშვილს, რომ დავალიანება გადაეხადა. მისივე თქმით, მათ „ლამის ერთმანეთისკენ“ გაიწიეს.

“სამწუხაროა, როდესაც ტელევიზია იხურება ქვეყანაში. ტელევიზია დაიხურა და ჟურნალისტებს არ უხდიან ხელფასს. რა თქმა უნდა, ეს მძიმეა. ყოფილი ხელისუფლების დროს მთლიანი მედია მონოპოლიზირებული იყო და ბიზნესს აშანტაჟებდა. ახლა ხდება პირიქით, ბიზნესმენი ცდილობს დააშანტაჟოს ხელისუფლება, რაც არ გაუვა. ყველა გადაიხდის იმას, რაც კანონით ეკუთვნით. 11-ჯერ გაუკეთეს რესტრუქტურიზაცია. ხვალ რომ დაიწყოს გადახდის პროცესი, ხვალვე გაუგრძელებენ და კიდევ ეთანამშრომლებიან. არ მიიღეებს ხელისუფლება მხედველობაში რაღაც ჩანაწერებს, რაც იკადრა ბიზნესმენმა, მოიქცეს ისე, როგორც ეკადრება კანონს და ეკუთვნის ბიუჯეტს.

ჟურნალისტების ადგილზე, დავსვამდი კითხვებს, როგორ მოახერხა ამ კომპანიამ ხელისუფლებასთან თემების დალაგება მაშინ როცა, ამდენი ხნის განმავლობაში ხდებოდა დავალიანების არგადახდა და ეს ვალები იყო მუდმივად ზრდადი და არა კლებადი. ჩემი აზრით, ეს კითხვა უფრო ლეგიტიმურია. როგორც ვიცი, მას კიდევ აქვს სხვა ბიზნესი. დეტალები ზუსტად არ ვიცი, მაგრამ ეს არის სამშენებლო, თუ მანქანების ბიზნესი.

ეს კაცი არ არის ღარიბი. იმასაც თუ გავიხსენებ, რაზეც დადიოდნენ ჩემთან ის და ლევან ყიფიანი, რამხელა პროექტს ვაკეთებდი, როგორ დახმარებას ვუწევდი. ნაცვლად იმისა, რომ ეს ბიზნესი განვითარებულიყო საქართველოში, მან საკმაოდ ძვირად გაყიდა გარეთ. ეს კაცი არ არის ღარიბი. ეს არ არის ჩემი ფული. კეთილი ინებოს და დავალიანება გადაიხადოს. პენსიონერებს პენსია სჭირდებათ, ჯარს ხელფასი და ა.შ. ეს არის ბიუჯეტის ფული. ამ საკითხზე სხვანაირი დამოკიდებულების უფლება აქვს კი ხელისუფალს? მე აქ უფრო მეტი კითხვები მიჩნდება.

თანავუგრძნობ „იბერიას“ ჟურნალისტებს. მე ეს ორჯერ მაქვს გაკეთებული, მე სხვა ხელწერით გავაკეთე, მაგრამ ეს ხელწერაც არ იყო ლამაზი. მე ხელფასი გადავუხადე, წინმსწრებად გავაფრთხილე ყველა, ყველაფერი გავაკეთე, მაგრამ ეს ძალიან ცუდია. ძალიან ცუდად მიხსენებენ ჟურნალისტები და თქვენც შემახსენეთ ახლა, სანამ დაიწყებოდა გადაცემა. მე ამაზე ჩემს წილ პასუხისმგებლობას არ ვიხსნი. არ არის კარგი, როდესაც დააფუძნებ და მერე დახურავ. როგორ კულტურულად და წესების დაცვითაც არ უნდა მოიქცე, ეს ძალიან ცუდია. ამ შემთხვევაში კიდევ ძალიან ცუდია, როგორც თქვენ შემთხვევაში განვითარდა“, - განაცხადა ბიძინა ივანიშვილმა.

16 ოქტომბერს გაირკვა, რომ "იბერიას" ახალი ამბების გამოშვება ეთერში ვეღარ გავა.