ჯაფარიძე: სააკაშვილს ვაშაძის გამარჯვებაზე მეტად, მეორე ტურამდე ქვეყანაში სიტუაციის დაძაბვა სურს

"გირჩის" საპრეზიდენტო კანდიდატი ზურაბ ჯაფარიძე ამბობს, რომ მიხეილ სააკაშვილს მეორე ტურში გრიგოლ ვაშაძის გამარჯვებაზე მეტად, მეორე ტურამდე საქართველოში სიტუაციის დაძაბვა და არევა სურს. ამის შესახებ ჯაფარიძემ Facebook Live-ში თქვა.

"კარგად ვიცნობ მიშა სააკაშვილს, ვაშაძის გაპრეზიდენტებაზე მეტად უნდა, რომ ეს ერთი თვე, მეორე ტურამდე სიტუაცია ქვეყანაში მაქსიმალურად დაიძაბოს და აირიოს. მას სურს, რომ მაქსიმალური ძალაუფლება ჩაიგდოს ხელში. ახლაც მგონია, რომ ასე უყურებს ამ რეალობას, ამაში დარწმუნებული ვარ. გაპრეზიდენტების მერე არა მგონია, მალევე ჩამოვიდეს, ჯერ გარანტიები სჭირდება", - თქვა ზურაბ ჯაფარიძემ.

ჯაფარიძემ მის მიერ მეორე ტურში გრიგოლ ვაშაძისთვის გამოხატული მხარდაჭერასთან დაკავშირებით თქვა, რომ მომავალში პირად აზრს აღარ დააფიქსირებს და პოზიცია იქნება საერთო, რომელსაც "გირჩი" გამოხატავს.

ცესკოს მონაცემებით, ზურაბ ჯაფარიძემ ხმების 2,26 % მიიღო.

„ნაციონალური მოძრაობის" ოპოზიციური ჯგუფი „ძალა ერთობაშია" საპრეზიდენტო არჩევნების მეორე ტურისთვის მზადებას იწყებს და ოპოზიციურ პარტიებთან კონსულტაციებს აანონსებს. „ევროპული საქართველოს“ ერთ-ერთი ლიდერის, ელენე ხოშტარიას თქმით, შიდაპარტიული კონსულტაციების შემდეგ გაირკვევა, რა ფორმით დაუჭერს მხარს პარტია გრიგოლ ვაშაძეს. 

გავრცელებული ცნობით, მეორე ტურში პატრიოტთა ალიანსი მხარს სავარაუდოდ ზურაბიშვილს დაუჭერს.

„შენების მოძრაობის“ საპრეზიდენტო კანდიდატი უსუფაშვილი კი ამბობს, რომ მეორე ტურში მხარს არც ზურაბიშვილს დაუჭერს და არც ვაშაძეს.

საქართველოში საპრეზიდენტო არჩევნები 28 ოქტომბერს გაიმართა. ცესკოს მონაცემების თანახმად, „ქართული ოცნების“ მიერ მხარდაჭერილმა დამოუკიდებელმა კანდიდატმა სალომე ზურაბიშვილმა ხმების - 38.64% მიიღო, „ნაციონალური მოძრაობის“ კანდიდატმა გრიგოლ ვაშაძემ - 37,74%.

საპრეზიდენტო არჩევნების მეორე ტური საბოლოო შედეგების გამოცხადებიდან ორი კვირის ვადაში ჩატარდება. სავარაუდო თარიღად კი 2 დეკემბერი სახელდება. 

2018 წლის საპრეზიდენტო არჩევნების პირველი ტურის საბოლოო შედეგებს სრულად შეგიძლიათ გაეცნოთ ამ ბმულზე.