ზურაბ ჯაფარიძე მეორე ტურში გრიგოლ ვაშაძეს მისცემს ხმას

საქართველოს პრეზიდენტობის კანდიდატი, „გირჩის“ ლიდერი ზურაბ ჯაფარიძე, რომელიც არჩევნების მეორე ტურში ვერ გადავიდა ამბობს, რომ მხარს დაუჭერს კანდიდატს, რომელმაც პედოფილად მოიხსენია, არა იმიტომ რომ ის მეორე კანდიდატს სჯობს, არამედ იმიტომ, რომ „თუ არსებობს შანსი ივანიშვილის ხელში არ იყოს ფორმალური ძალაუფლების თუნდაც ერთი, თუნდაც სუსტი ბერკეტი, ეს შანსი გამოსაყენებელია“. ამის შესახებ ჯაფარიძემ Facebook-ზე დაწერა.

„ხმას მივცემ ადამიანს, რომლის კარიერული პიკი, რომ არა პრეზიდენტი სააკაშვილი, იქნებოდა საბჭოთა კავშირის საგარეო საქმეთა სამინისტროს საშუალო დონის ჩინოვნიკობა, რომელმაც პედოფილთან გამაიგივა პირადად მე და ასობით ათასი ამ ქვეყნის მოქალაქე, რომელმაც მთელი წინასაარჩევნო კამპანია ააგო იმ მიზანთან ბრძოლაზე, რისთვისაც ჩემი ცხოვრების უკანასკნელი 12 წლის მნიშვნელოვანი ნაწილი მაქვს დათმობილი, და რომლის არჩევის შემთხვევაში, შეიძლება აღმოჩნდეს რომ სულ ცოტა ხნის წინ ქვეყნის პირველ ლედის მოსკოვში აქვს ნაცეკვი 25 თებერვალს“, - აღნიშნა ჯაფარიძემ.

„ნებისმიერი მცდელობა ხაზის გავლების, თითქოს, ერთი უფრო ნაკლებად ცუდია, ან ნაკლებად საშიშია ვიდრე მეორე, ჩემთვის არის მასტურბაცია“, - აღნიშნა „გირჩის“ პრეზიდენტობის კანდიდატმა.

ცესკოს მონაცემებით, ზურაბ ჯაფარიძემ ხმების 2,26 % მიიღო.

28 ოქტომბერს ზურაბ ჯაფარიძე აცხადებდა, რომ მეორე ტურის დანიშვნის შემთხვევაში საჯაროდ არ დააფიქსირებდა პოზიციას და არც მხარდამჭერებს მოუწოდებდა რომელიმე კანდიდატის მხარდაჭერისკენ.

“საჯაროდ არ დავაფიქსირებ არჩევანს და არც არავის მოვუწოდებ. გადაწყვეტილებას მივიღებ მეთვითონ, ჯერ ჩამოყალიბებული არ ვარ, მაგრამ “გირჩი” არ არის პარტია, ჩვენ არ გვაქვს პარტიული სტრუქტურა, სადაც ფულს ჩაასახამ და რა მიმართულებითაც მიმართავ შემდეგ რესურსს, იქით წავა. არ არის „გირჩის“ მხარდამჭერები ის ხალხი, რომელიც ლიდერი რასაც ეტყვის, იმას გააკეთებს. თვითონ მიიღებენ საკუთარ გადაწყვეტილებას”, - განაცხადა ზურა ჯაფარიძემ.

29 ოქტომბერს ცნობილი გახდა, რომ ჯაფარიძის პარტიული ორგანიზაცია „გირჩი“ მეორე ტურში მხარს არც ერთ კანდიდატს დაუჭერს. 

„ნაციონალური მოძრაობის" ოპოზიციური ჯგუფი „ძალა ერთობაშია" საპრეზიდენტო არჩევნების მეორე ტურისთვის მზადებას იწყებს და ოპოზიციურ პარტიებთან კონსულტაციებს ააანონსებს. „ევროპული საქართველოს“ ერთ-ერთი ლიდერის ელენე ხოშტარიას თქმით, შიდაპარტიული კონსულტაციების შემდეგ გაირკვევა, რა ფორმით დაუჭერს მხარს პარტია გრიგოლ ვაშაძეს. 

გავრცელებული ცნობით, მეორე ტურში პატრიოტთა ალიანსი მხარს სავარაუდოდ ზურაბიშვილს დაუჭერს.

„შენების მოძრაობის“ საპრეზიდენტო კანდიდატი უსუფაშვილი კი ამბობს, რომ მეორე ტურში მხარს არც ზურაბიშვილს დაუჭერს და არც ვაშაძეს,

ცენტრალურ საარჩევნო კომისიაში ხმების დათვლა დასრულდა. ცესკოს მონაცემების თანახმად, „ქართული ოცნების“ მიერ მხარდაჭერილმა დამოუკიდებელმა კანდიდატმა სალომე ზურაბიშვილმა ხმების - 38.64% მიიღო, „ნაციონალური მოძრაობის“ კანდიდატმა გრიგოლ ვაშაძემ - 37,74%.

2018 წლის საპრეზიდენტო არჩევნების პირველი ტურის საბოლოო შედეგებს სრულად შეგიძლიათ გაეცნოთ ამ ბმულზე.