მიხეილ სააკაშვილი რუსთავი 2-ის ჟურნალისტებისთვის წილების გადაცემას ეხმიანება

საქართველოს ექსპრეზიდენტი ტელეკომპანია "რუსთავი 2"-ის წილების ჟურნალისტებისთვის გადაცემის შესახებ განცხადებას Facebook-ზე ავრცელებს. 

სააკაშვილის თქმით, ტელეკომპანიის დამფუძნებლების გადაწყვეტილება უპრეცედენტო და დასაფასებელია. 

მისი შეფასებით, "ყველა ტელევიზია უნდა მართონ თვითონ ჟურნალისტებმა და იმ ადამიანებმა, ვინც ქმნის ტელეპროდუქციას."

"ფბ-ზე ვადევნებ თვალს რუსთავი 2-ის მართვაზე მიმდინარე დებატებს. პირველ რიგში, მე ვარ თითოეული რუსთავიორელის გულშემატკივარი. აღფრთოვანებული ვარ მათი გამბედაობით და პატრიოტიზმით. 

მიმაჩნია, რომ ნიკა გვარამიას როლი ტელევიზიისთვის ურთულეს პერიოდში, პირადი საფრთხის ფასად, იყო ძალიან მნიშვნელოვანი. მან არაერთხელ დაამტკიცა თავისი, როგორც ხელმძღვანელის ეფექტურობა და ის, რომ მას, როგორც მენეჯერს, დიდი სარგებლის მოტანა შეუძლია

ჩემი აზრით, ეს და საერთოდ ყველა ტელევიზია უნდა მართონ თვითონ ჟურნალისტებმა და იმ ადამიანებმა, ვინც ქმნის ტელეპროდუქციას.

ამიტომ, მფლობელების წინადადება კოლექტივისთვის წილების განაწილებაზე და მათ მფლობელობაში შემოყვანაზე, უპრეცენდენტოა და დასაფასებელი.

ძმები ყარამანიშვილები მაგრად დაუდგნენ ივანიშვილს და არ წავიდნენ არანაირ გარიგებაზე, მიუხედავად დიდი ზეწოლისა. 

თუ როგორ და რა ფორმით უნდა მოხდეს შეთავაზების რეალიზება, ამას მენეჯმენტი, კოლექტივი და მფლობელები, დიდი იმედი მაქვს, ერთმანეთთან დიალოგის გზით გადაწყვეტენ და ერთობლივი ქმედებებით განავითარებენ საქართველოში დარჩენილ ბოლო დემოკრატიულ ინსტიტუტს - რუსთავი 2ს." - წერს საქართველოს ექსპრეზიდენტი მიხეილ სააკაშვილი. 

23 მარტს, ტელეკომპანია "რუსთავი 2"-ის მფლობელებმა ძმებმა ყარამანიშვილებმა განცხადება გაავრცელეს, რომელშიც ისინი ტელევიზიის თანამშრომლებს კომპანიის 40%-იან წილის გადაცემას სთავაზობდნენ. მოგვიანებით, "რუსთავი 2"-ის გენერალურმა დირექტორმა ნიკა გვარამიამ, არხის დამფუძნებლების შეთავაზებაზე უარი განაცხადა და თქვა, რომ 40%-იანი წილის დათმობა არსობრივად საქმის ვითარებას არ ცვლიდა, რადგან გადამწყვეტი ხმის უფლება ისევ ტელეკომპანია "საქართველოს" დარჩებოდა. 24 მარტს, ძმებმა ყარამანიშვილებმა ახალი განცხადება გაავრცელეს, რომლის თანახმადაც, ისინი მზად იყვნენ მიეცათ "რუსთავი 2"-ის წილის საკონტროლო პაკეტი ტელევიზიის თანამშრომლებისთვის. ამ ინიციატივაზე, ნიკა გვარამიამ ახალი მოთხოვნა წამოაყენა, რაც შუამავალი შპს-ს შექმნას გულიხსმობს, რომელშიც არხის 20-დან 50-მდე თანამშრომელი შევიდოდა. ისინი გადაცემულ წილებზე იქნებოდნენ პასუხისმგებელნი. ძმები ყარამანიშვილების შეფასებით კი შპს-ს შექმნა კომპანიისთვის არაგონივრული და დამაზიანებელია.
დღესვე, "რუსთავი 2"-ის თანამშრომლებმა განაცხადეს, რომ შპს "რუსთავი 2 ჩემია"-ს ქმნიან.