სესიაშვილი: სამხედროების პოლიტიკაში ჩართვა სისტემას ანგრევს

პარლამენტის თავდაცვისა და უშიშროების კომიტეტის თავმჯდომარე ირაკლი სესიაშვილი აცხადებს, რომ პოლიტიკაში სამხედრების ჩართვა სისტემას ანგრევს და ამის მაგალითად კი ჯაბა იოსელიანი მოყავს. მის კომენტარს სააგენტო "ინტერპრესნიუსი" ავრცელებს.

"ყველა ვხვდებით, რომ ამ განცხადებების უკან პირდაპირ თუ არაპირდაპირ დგას „ნაციონალური მოძრაობის“ ინტერესები. გული მწყდება, რომ ელემენტარულად ვერ ხდება იმ პრინციპების დაცვა, რაც აღიარებულია საერთაშორისო ნომრებით. არ შეიძლება სამხედროების და ფორმიანი ადამიანების პოლიტიკაში ჩართვა, ეს ანგრევს სისტემას. ჩვენ ძალიან კარგად გვახსოვს ჯაბა იოსელიანი და სხვები, ვინც სამხედრო ფორმებში განცხადებებს აკეთებდნენ, მაგრამ უნდა ვიცოდეთ, რომ ეს ქმედება ჩაბარდა წარსულს. ამ ქმედებით, რასაც დღეს ჩვენ ვხედავთ და ამას კამპანიური ხასიათი აქვს, კარგად ჩანს ჩვენი ოპონენტების დამოკიდებულება სახელმწიფოებრიობასთან. არ შეიძლება პოლიტიკური მიზნებისთვის ჩართო სამხედროები", - განაცხადა სესიაშვილმა. 

მიხეილ სააკაშვილის მხარდამჭერმა ყოფილმა სამხედროებმა სოცქსელში "ქართული ოცნების" მიერ მხარდაჭერილი დამოუკიდებელი საპრეზიდენტო კანდიდატის, სალომე ზურაბიშვილის წინააღმდეგ კამპანიის წარმოება დაიწყეს. პოსტების მიხედვით მათთვის დამოუკიდებელი კანდიდატის განცხადებები მიუღებელია და საზოგადოებას მოუწოდებენ არ დაუჭირონ მას მხარი. 

რამდენიმე დღის წინ ყოფილმა სამხედრო მოსამსახურებმა მუხათგვერდის სასაფლაოზე აგვისტოს ომის დაწყებასთან დაკავშირებით ვიდეომიმართვა ჩაწერეს და მოწოდება გააკეთეს, რომ სალომე ზურაბიშვილს მხარი არ დაუჭირონ. გენერალმა დევი ჭანკოტაძემ მოსახლეობას მოუწოდა, არ მისცეს ხმა იმ პრეზიდენტს, რომელიც აგვისტოს ომის დაწყებას საქართველოს აბრალებს.

ამ ფაქტთან დაკავშირებით, თავდაცვის სამინისტრომ ყოფილ სამხედრო მოსამსახურეებს, მოქალაქეებსა და პოლიტიკური გაერთიანების წარმომადგენლებს მიმართა, რომ ნუ ეცდებიან ჩარიონ შეირაღებული ძალები პოლიტიკურ და საარჩევნო კამპანიაში.