ევროპარლამენტარი: ყოფილი რუსი ელჩი საქართველოს პრეზიდენტად მიუღებელია

ევროპარლამენტის პლენარულ სესიაზე საქართველოს მიერ ასოცირების შეთანხმების შესრულების შესახებ ანგარიშის განხილვა დაიწყო, რომელსაც ანგარიშის ავტორი ანდრეს მამიკინსი წარადგენს. ევროპარლამენტში ამ წუთებში დებატები მიმდინარეობს, რომლის დროსაც რომლის დროსაც ევროპარლამენტის რუმინელმა წევრმა ვიქტორ ბოშტინარუმ მოლდოვას და საქართველოს არჩევნებზეც ილაპარაკა და აღნიშნა, რომ ყოფილი საბჭოთა დიპლომატი საქართველოს პრეზიდენტად კარგი არ იქნება.

„მჯერა, რომ საქართველო და მოლდოვა მნიშვნელოვანი ქვეყნები არიან ევროკავშირისთვის. ამაზე მეტყველებს პროგრესი, რომელსაც ორივე ქვეყანამ მიაღწია. გასაკუთრებით საქართველომ. ამაზე მეტყველებს ქვეყანაში ჩატარებული საპრეზიდენტო არჩევნები. ამასთან, გვინდა იმის თქმაც, რომ ყოფილი რუსი ელჩი და „ნაციონალური მოძრაობის“ კანდიდატი ვერ იქნება მისაღები საქართველოს პრეზიდენტის პოსტზე“, - განაცხადა ვიქტორ ბოშტინარუმ.

„ნაციონალური მოძრაობის“  საპრეზიდენტო კანდიდატმა, გრიგოლ ვაშაძემ მოსკოვის სახელმწიფო საერთაშორისო ურთიერთობების ინსტიტუტში საერთაშორისო სამართლის ფაკულტეტი 1981 წელს დაამთავრა. 1981-1988 წლებში საბჭოთა კავშირის საგარეო საქმეთა სამინისტროში , საერთაშორისო ორგანიზაციების განყოფილებაში, შემდეგ კი კოსმოსის და ბირთვული შეიარაღებების განყოფილებაში მუშაობდა.

ევროპარლამენტში საქართველოსთან ასოცირების შეთანხმების შესრულების შესახებ ანდრეს მამიკინსის ანგარიშის პროექტი 9 ოქტომბერს დაამტკიცეს. დოკუმენტს კომიტეტის 43-მა წევრმა დაუჭირა მხარი.

ანდრეს მამიკინსის ანგარიში სექტემბრის დასაწყისში საქარ თველოს შესახებ დებატების საგანი გახდა. ოპოზიციას ქვეყანაში არსებულ ვითარებაზე, ანგარიშის ავტორისგან განსხვავებული მოსაზრებები ჰქონდა. მოსაზრებების გასამყარებლად ისინი ბრიუსელში ჩავიდნენ. მმართველმა პარტიამ ეს ქვეყნის ინტერესების წინააღმდეგ გადადგმულ ნაბიჯად შეაფასა.