ევროპარლამენტში საქართველოს მიერ ასოცირების შეთანხმების შესრულებაზე ანგარიშს განიხილავენ

დღეს ევროპარლამენტის პლენარულ სესიაზე საქართველოს მიერ ასოცირების შეთანხმების შესრულების შესახებ ანგარიშის განხილვაა დაგეგმილი, რომელსაც ანგარიშის ავტორი ანდრეს მამიკინსი წარადგენს. 

ანგარიშში დადებითად არის შეფასებული ღრმა და ყოვლისმომცველი თავისუფალი სავაჭრო შეთანხმებების შესრულების პროცესი. დადებითად არის შეფასებული საქართველოს მცდელობა,  დროულად მოეგვარებინა ვიზალიბერალიზაციასთან დაკავშირებული დარღვევები. ანგარიშით ევროპარლამენტი საქართველოს მოუწოდებს, რომ გააგრძელოს დემოკრატიული რეფორმები და გადაჭრას ისეთი საკითხები, რომლებიც დაკავშირებულია ეკონომიკურ-სოციალურ მდგოამრეობასთან, სიღარიბესთან, ქალთა უფლებებთან და ა.შ.

ანგარიშში ასევე საუბარია საქართველოს საკონსტიტუტიციო რეფორმაზე და ამ მხრივ, ევროკავშირის პოზიცია ვენეციის კომისიის დადებით შეფასებას ემთხვევა, თუმცა სამწუხაროდ არის შეფასებული ფაქტი, რომ საქართველოში პროპორციულ საარჩევნო სისტემაზე გადასვლის ვადამ 2024 წლამდე გადაიწია. 

რეზოლუციის პროექტში ასევე წერია, რომ ევროკავშირი მხარს უჭერს საქართველოში პოლიტიკური ინსტიტუტების გაძლიერებას და მომხრეა, რომ აღმასრულებელი ხელისუფლების შტოს გასაკონტროლებლად საკანონმდებლო ორგანოს წარმომადგენლებს უფრო ინტენსიურად მიეცეთ მინისტრებისა და მთავრობის ხელმძღვანელისთვის შეკითხვების დასმის საშუალება. 

ანგარიშში ასევე წერია, რომ ევროკავშირი მხარს უჭერს კონფლიქტის მშვიდობიანი გზით მოგვარებას და მიესალმება საქართველოს ძალისხმევას ამ საკითხზე რუსეთთან დიალოგის შესახებ. აქვე აღნიშნულია, რომ რუსეთი საქართველოს ტერიტორიების ოკუპაციას აგრძელებს.

ანგარიშში ასევე წერია, რომ საქართველოს დაბალი და საშუალო დონის კორუფციასთან ბრძოლის წინააღმდეგ კარგი შედეგები აქვს, თუმცა პრობლემად რჩება ელიტური კორუფციის საკითხი.

პროექტში მოხვდა აზერბაიჯანელი ჟურნალისტის აფგან მუხტარლის გატაცების, ყოფილი შს მინისტრის ვანო მერაბიშვილისა და "რუსთავი 2"-ის საკითხები. ანგარიშის თანახმად, შეშფოთებას იწვევს თურქეთის მიერ საქართველოში მცხოვრებ თურქებზე, მათ შორის საგანმანათლებლო სფეროში დასაქმებულებზე განხორციელებული ზეწოლა, საუბარია შავი ზღვის უნივერსიტეტზე.

ამასთან, ანგარიშში წერია, რომ გაერთიანება საქართველოს პარტნიორად განიხილავს და მზად არის რეფორმების გზაზე დაეხმაროს.

ევროპარლამენტში საქართველოსთან ასოცირების შეთანხმების შესრულების შესახებ ანდრეს მამიკინსის ანგარიშის პროექტი 9 ოქტომბერს დაამტკიცეს. დოკუმენტს კომიტეტის 43-მა წევრმა დაუჭირა მხარი.

ანდრეს მამიკინსის ანგარიში სექტემბრის დასაწყისში საქართველოს შესახებ დებატების საგანი გახდა. ოპოზიციას ქვეყანაში არსებულ ვითარებაზე, ანგარიშის ავტორისგან განსხვავებული მოსაზრებები ჰქონდა. მოსაზრებების გასამყარებლად ისინი ბრიუსელში ჩავიდნენ. მმართველმა პარტიამ ეს ქვეყნის ინტერესების წინააღმდეგ გადადგმულ ნაბიჯად შეაფასა.