კალაძემ ზაზა სარალიძის აქციასთან დაკავშირებით კომენტარი კიდევ ერთხელ გააკეთა

დედაქალაქის მთავრობის სხდომაზე თბილისის მერმა კახა კალაძემ ზაზა სარალიძის აქციასთან დაკავშირებით კომენტარი კიდევ ერთხელ გააკეთა.

"მინდა კიდევ ერთხელ გამოვეხმაურო უკანასკნელ დღეებში თბილისის მუნიციპალიტეტის, მისი თანამშრომლებისა და პირადად ჩემ წინააღმდეგ წარმოებულ სრულიად უტიფარ, ცილისმწამებლურ პროპაგანდას თითქოს თბილისის მერიამ ზაზა სარალიძეს რუსთაველზე პროტესტის გამოხატვის უფლება შეუზღუდა. კიდევ ერთხელ ვიმეორებ, რომ ეს არის ძალიან დიდი ტყუილი. ჩვენ ამასთან დაკავშირებით რამდენიმე დღის წინ ვისაუბრეთ და გავასაჯაროვეთ ყველა მიმოწერა.

ნოემბრის დასაწყისში, ზაზა სარალიძემ წერილით მოგვმართა დედაქალაქის მერიას, რომ 31 დეკემბრამდე ჰქონდა აქციების გაგრძელების სურვილი. წერილს მუნიციპალიტეტის მხრიდან შესაბამისი რეაგირება მოhყვა. ეს იყო ჩვენი ვალდებულება, რომ სამი დღის განმავლობაში გაგვეცა პასუხი, რადგან დედაქალაქის მერიას 15 დეკემბრიდან თვის ბოლომდე დაგეგმილი აქვს საახალწლო ღონისძიებები. ვალდებულები ვიყავით გაგვეცა პასუხი, რაც ასახული იყო წერილობით და ესეც გავაცანით მოსახლეობას.

ჩემთვის წარმოუდგენელია რომელი ოპონენტის ავადმყოფურ გონებაში მომწიფდა ის აზრი, რომ შეურაცხმყოფელი ტოლობის ნიშანი დაესვა საახალწლო ნაძვის ხესა და შვილმკვდარი მამის პროტესტს შორის, შემდეგ კი ეს ყველაფერი გადმოებრალებინა ჩვენთვის. ჩვენ გვახსოვს რამდენიმე დღის წინ, როდესაც პირდაპირ ეთერში საუბრობდნენ, რომ ნაძვის ხის დადგმის გამო, არ აძლევენ კარვების გაშლის, პროტესტის გამოხატვის უფლებას და ა.შ. ეს არის კიდევ ერთი ნათელი მაგალითი იმისა თუ როგორ მუშაობს „ნაციონალური მოძრაობის“ პარტიული ტელევიზია „რუსთავი 2“. კონკრეტულად ამ ტელევიზიის ხელმძღვანელი საუბრობდა ამ ყველაფერზე პირდაპირ ეთერში, რომ თითქოს ჩვენ ვიყავით ყველაფერ ამის თავი და ბოლო. ეს კატეგორიულად მიუღებელია. თუმცა, ეს სიცრუის პროპაგანდა, რომელსაც ისინი აწარმოებენ, და მთელი სარედაქციო პოლიტიკა დაფუძნებულია სიცრუეზე, შუღლზე.

ჩვენ ნამდვილად არ გადავუხვევთ ჩვენ მიერ არჩეული გზიდან, რომელიც ადამიანის ღირსებაზე, საკუთარი ხალხის პატივისცემასა და ქვეყნის განვითარებაზეა ორიენტირებული. პირადად ჩემთვის, როგორც ერთი ადამიანისთვის და მთლიანად ჩვენი გუნდისთვის ადამიანის ღირსება, მისი უფლებები გამოხატვის თავისუფლება არის უმთავრესი ფასეულობა, რომლის დაცვის გარანტიც ქართულ საზოგადოებასთან ერთად, ვიქნებით ყოველთვის, არავის მივცემთ იმის უფლება, რომ მოსახლეობა შეიყვანონ შეცდომაში,"- თქვა კალაძემ. 

აქცია სახელწოდებით „კარვებით ვიცავ თავისუფლებას“ რუსთაველის გამზირზე თბილისის მერის კახა კალაძის განცხადებას მოჰყვა. ზაზა სარალიძემ მერიას თხოვნით მიმართა, რომ აქციის ჩატარების უფლება დეკემბრის ბოლომდე მიეცათ, თუმცა მერიაში განუცხადეს, რომ 7 დეკემბრიდან დაგეგმილი აქციის ჩატარების დრო და ადგილი შეეცვალა.

სარალიძის შვილი, დავით სარალიძე ერთ-ერთი იყო 2017 წლის პირველ დეკემბერს ხორავას ქუჩაზე მოკლული ორი არასრულწლოვნიდან. ამ საქმეზე პარლამენტში დროებითი საგამოძიებო კომისია შეიქმნა. საგამოძიებო კომისიის პარალელურად, გამოძიებას ხელახლა აწარმოებს შინაგან საქმეთა სამინისტრო. მკვლელობის საქმეზე ახალი გარემოებების დადგენის მიზნით, გამოძიებას უშუალოდ გიორგი გახარია ხელმძღვანელობს.