წულუკიანი: ჯარმა ყველაზე კარგად იცის, რომ მთავრობა მისი ყველაზე ერთგული დამცველია

იუსტიციის მინისტრ თეა წულუკიანის განცხადებით, ჯარმა ყველაზე კარგად იცის, რომ იუსტიციის მინისტრი და იუსტიციის სამინისტრო, ასევე ქართული ოცნების მთავრობა, იყო არის და იქნება მათი ყველაზე ერთგული მხარდამჭერი. ამის შესახებ წულუკიანმა ჟურნალისტებს სამხედროების შესახებ სააკაშვილის მიერ გავრცელებული ინფორმაციის კომენტირებისას განუცხადა. 

,,ჩვენ ძალიან კარგად გვახსოვს ნაციონალური მოძრაობის კამპანია. მათი მთავარი მიზანი იყო საარჩევნო ადმინისტრაციის დისკრედიტაცია და მასზე განუწყვეტელი დარტყმები, რაც უშედეგოდ დასრულდა. ყველამ აღიარა, რომ არჩევნები პროფესიონალურ დონეზე ჩატარდა. შემდეგ იგივე გაგრძელდა სხვადასხვა ინსტიტუტის მიმართ და დღეს მიმდინარეობს ყოვლად უსირცხვილო დარტყმები იმაზე, რაც ჩვენი სახელმწიფოებრიობის ერთ-ერთი ფუნდამენტია. ეს არის ჩვენი ჯარი. ნაცმოძრაობა ცდილობს ჯარისკაცები აიყოლიოს ამ პროვოკაციაში და არ გამოუვათ. ვინ ვინ და, ჯარმა ყველაზე კარგად იცის სხვადასხვა საერთაშორისო ორგანიზაციაში, ასევე ქვეყნის გარეთ იუსტიციის მინისტრი და იუსტიციის სამინისტრო, ასევე ქართული ოცნების მთავრობა იყო, არის და იქნება მათი ყველაზე ერთგული მხარდამჭერი.

ჩვენ სხვა მიზანი გვამოძრავებს - დავამტკიცოთ ქართველების ეთნიკური წმენდა, ჩვენი სამხედრო ტყვეების წამება და ა.შ.", - განაცხადა წულუკიანმა.

ბოლო დროს ჰააგის სასამართლოში აგვისტოს ომის შესახებ მიმდინარე გამოძიება ნაციონალური მოძრაობისთვის წინასაარჩევნო კამპანიის ნაწილად იქცა. გრიგოლ ვაშაძის შტაბი და მისი მხარდამჭერი ექსპრეზიდენტი სააკაშვილი ამ თემაზე საკუთარ ინტერპრეტაციებს ამომრჩევლებზე რეალობად ასაღებს, თითქოს ხელისუფლება ცდილობს, რომ აგვისტოს ომში მონაწილე სამხედროები ჰააგის ტრიბუნალის წინაშე წარდგნენ.

რა ხდება სინამდვილეში ჰააგაში და როგორ ცდილობს ხელისუფლება ნაციონალური მოძრაობის მიერ წაგებული პროცესის შემობრუნებას ამის შესახებ თეა წულუკიანმა გადაცემაში „იმედი-Live“ ისაუბრა.

ნაციონალების მცდელობას ჯარში არეულობა შეიტანონ, დღეს ქალაქის მერმა, კახა კალაძემაც უპასუხა. კალაძის თქმით, სასამართლო ოკუპანტებს ელოდებათ, გმირებს კი - დიდება და პატივი.