კალაძე: მთავრობის ხვალინდელმა გადაწყვეტილებამ ნაციონალები შოკში ჩააგდო

თბილისის მერი და პარტია "ქართული ოცნება - დემოკრატიული საქართველოს" გენერალური მდივანი კახა კალაძე "ნაციონალური მოძრაობის" საპრეზიდენტო კანდიდატის გრიგოლ ვაშაძის მიერ "შავი სიებიდან" მოქალაქეების ამოღებაზე გაკეთებულ განცხადებას ეხმიანება. კალაძის შეფასებას სააგენტო "ინტერპრესნიუსი" ავრცელებს.

კახა კალაძის განცხადებით, 19 ნოემბერს პრემიერმინისტრი ჭარბვალიანობის დაძლევის გზაზე უმნიშნველოვანეს გადაწყვეტილებას გამოაცხადებს. კალაძის თქმით, ე.წ. საბანკო „შავი სიის“ პრობლემის მოსაგვარებლად მთავრობა ხვალ აცხადებს მასშტაბურ გადაწყვეტილებას, რამაც „ნაციონალური მოძრაობა“ შოკში ჩააგდო და კლოუნადა მოაწყო. 

„როგორც ჩანს „ნაციონალური მოძრაობა“ და მისი ლიდერი შოკში ჩააგდო ინფორმაციამ იმის თაობაზე, რომ საქართველოს მთავრობა ხვალ აცხადებს მასშტაბურ და პრინციპულ გადაწყვეტილებას, რაც იქნება უმნიშვნელოვანესი ნაბიჯი ჭარბვალიანობის დასაძლევად და ე.წ. „შავი სიის“ პრობლემის მოგვარების გზაზე. ამ შოკის გამოხატულება იყო ის კლოუნადა, რომელიც რამდენიმე საათის წინ პირდაპირ ეთერში მოაწყო გრიგოლ ვაშაძემ. „ქართული ოცნება“ ასრულებს დაპირებას, რომელზეც პარტიის თავმჯდომარემ პოლიტიკაში დაბრუნებისას საუბრობდა და რომლის განხორციელება პრემიერ-მინისტრმა მამუკა ბახტაძემ ჯერ კიდევ ფინანსთა მინისტრობის დროს დაიწყო.

მინდა მივმართო „ნაციონალური მოძრაობის“ ლიდერებს, დამშვიდდით, ნუ კანკალებთ, შეწყვიტეთ პანიკა და შეეგუეთ, რომ ხელისუფლება თქვენგან მემკვიდრეობით მიღებულ პრობლემებს აგვარებს და მომავალშიც მოაგვარებს. დაელოდეთ, ხვალ პრემიერმინისტრი გამოაცხადებს უმნიშვნელოვანეს გადაწყვეტილებას ჭარბვალიანობის დაძლევის გზაზე“, - განაცხადა კახა კალაძემ.

"ნაციონალური მოძრაობის" საპრეზიდენტო კანდიდატმა გრიგოლ ვაშაძემ საქართველოს მთავრობას წაუყენა რამდენიმე მოთხოვნა მოქალაქეების საბანკო დავალიანებებთან დაკავშირებით. ვაშაძე მოითხოვს ე.წ. შავი სიიდან ამოიღონ ის მოქალაქეები, რომლებიც ვერ იხდიან კრედიტებს და ჩამოეწეროთ ვალდებულებები. ამის შესახებ მან პრესკონფერენციაზე ილაპარაკა.