მასწავლებლის თვითშეფასების კითხვარი შესაძლოა გაუქმდეს

„დეკემბრის ბოლოს სამინისტრო გაგვაცნობს ხედვას მასწავლებლის სტატუსთან დაკავშირებით, ერთადერთი, რაც შემიძლია დარწმუნებით ვთქვა, პედაგოგთა თვითშეფასების კრიტერიუმი ცალსახად გაუქმდება“, - ამის შესახებ მასწავლებელთა პროფესიული განვითარების ეროვნული ცენტრის ახალმა ხელმძღვანელმა ბერიკა შუკაკიძემ განაცხადა. ინფორმაციას edu.aris.ge ავრცელებს.

„ვმუშაობთ იმ პოლიტიკაზე, რომ მასწავლებელმა სტატუსი შეინარჩუნოს, რადგან ამაზე მისი ხელფასია მიბმული. ვფიქრობ, ყველაფერი გამარტივებისკენ წავა. ამჯერად, ერთადერთი, რაც შემიძლია დარწმუნებით გითხრათ, ისაა, რომ, ცალსახად, გაუქმდება მასწავლებელთა თვითშეფასების კრიტერიუმი, რადგან პედაგოგთა შეფასების ეს ნაწილი სრულიად უშედეგო გამოდგა. ჩვენ გვინდა, რომ მასწავლებლის სქემის სტანდარტი იყოს ისეთი ეფექტური, რომ ხელი შეუწყოს მოსწავლის პიროვნულ ზრდას და აკადემიურ წარმატებას. არ გვინდა, რომ მასწავლებელი ასრულებდეს ისეთ სამუშაოს, რომელიც არ აისახება მის ეფექტურობაზე საკლასო ოთახში, გვინდა მეტი ისეთი აქტივობა და რეგულაცია შემოვიღოთ, რომელიც დაეხმარება მასწავლებელს, უფრო ეფექტური გახდეს საკლასო ოთახში, ესაა ჩვენ ამოცანა“, - აცხადებს ბერიკა შუკაკიძე.

ასევე გაირკვა, რომ მასწავლებლის თვითშეფასების კითხვარი, როგორც სქემის სავალდებულო შემადგენელი, აღარ იარსებებს და ის მხოლოდ სარეკომენდაციო სახით დარჩება, ანუ მასწავლებელს, თუ სურვილი ექნება, შეავსებს. 

„პირველი ჩვენი მასწავლებელთა პროფესიული განვითარების ცენტრი იქნება, რომელიც მიიღებს მონაწილეობას დეცენტრალიზაციაში, სკოლებს და მასწავლებლებს მეტი ნდობა უნდა გამოვუცხადოთ, უნდა დავეხმაროთ მეთოდოლოგიურად, წახალისებული იქნება ყველა ტიპის წარმატება, რასაც პედაგოგი სისტემაში გამოავლენს“, - აცხადებს ბერიკა შუკაკიძე.

აქამდე მასწავლებლის თვითშეფასების კითხვარის შევსება სასწავლო წლის დასაწყისში ყველა მასწავლებლისთვის სავალდებულო იყო.

პედაგოგთა პროფესიული განვითარებისა და კარიერული წინსვლის სქემაში შესული ცვლილებების პარალელურად თვითშეფასების კითხვარი ერთხელ უკვე შეიცვალა და ის საგრძნობლად შემცირდა.