„იბერიას“ საინფორმაციო სამსახურის ყოფილი უფროსი ტელეკომპანიის მფლობელებს დაუპირისპირდა

ტელეკომპანია „იბერიის“ საინფორმაციო სამსახურის ყოფილი უფროსი ვახო ხუზმიაშვილი არხის მფლობელებს დაუპირისპირდა, ბრალს სდებს თანამშრომლებისადმი უპასუხისმგებლო დამოკიდებულებასა და შრომითი უფლებების დარღვევაში. ამის შესახებ ის სოციალურ ქსელში წერს.

"ამოვიდა ყელში! ამდენი თვეა დავდივარ და ზაზა ოქუაშვილს ვამართლებ და ვიცავ ყველგან და ამ კაცს ერთხელაც არ მოვუკითხივართ. ჩვენ ხო მარტო ჟურნალისტები არ ვართ. ხო ველაპარაკებით ჩვენ ჩვენ ოჯახებს, მეგობრებს, მეზობლებს - ეხლა ამათთანაც კი მრცხვენია. მის გვერდით მაშინ ვიდექი, როცა იბერიას არბევდნენ და მაშინ ვინც იარაღს გვადებდა და ძირს გვყრიდა, დღეს ოქუაშვილი იმასთან ერთადაა. აქამდე არავის უთქვამს რომ სიგარეტის ფაბრიკის პრესსამსახური ვიყავით და სიგარეტის გაყიდვებზე იყო დამოკიდებული  დამოუკიდებელი ტელეკომპანია იბერია. ეთქვა მაინც მამაცხონებულს. ყველა ჩვენ ჩვენ არჩევანს გავაკეთებდით. რატო მაქვს პრეტენზია? იმიტომ რომ შეუძლებელია სადღაც მართალი იყო და სადღაც გადამგდები. რაც არ უნდა შეგვიფუთოს ამ კაცმა, რომლის გამო აქციებზე ხმა გვქონდა ჩახლეჩილი, იმის ღირსად მაინც უნდა ჩავეთვალეთ თავისივე თანამშრომლები რომ წესიერად აეხსნა რა უნდოდა და რა მოტივით გვიყენებდა ამდენი ხანი,"- წერს ხუზმიაშვილი.

მანვე დღეს პრესკონფერენცია ჩაატარა და მხარი დაუჭირა ტელეკომპანიის იმ თანამშრომლებს, რომლებმაც კუთვნილი ხელფასის ასანაზღაურებლად სასამართლოს მიმართეს.

„როცა, გაჩერდა ტელევიზია, იმ დღეს ჟურნალისტებს არავინ შეხვდა. მეორე დღეს, როცა ეს შეხვედრა გაიმართა ტელევიზიის ერთ-ერთმა დამფუძნებელმა თანამშრომლებს უთხრა, რომ ფინანსური პრობლემების გამო მიგვემართა საქართველოს ხელისუფლებისთვის, ეს იყო ჩვენი დაცინვა. ჟურნალისტებმა არ უნდა მოთხოვონ ფული ხელისუფლებას, ფული უნდა გადაიხდოს მან, ვინც დაიქირავა ეს ჟურნალისტები. მგონია, რომ აბსოლუტურად უპასუხისმგებლოდ მოიქცნენ „იბერიის“ დამფუძნებლები. ჩვენ ვიომეთ, ვიბრძოლეთ და ბოლოს აღმოვჩნდით ქუჩაში და მადლობაც არავინ გვითხრა“ - განაცხადა ხუზმიაშვილმა.

„ომეგა-ჯგუფი,“ რომლის შემადგენლობაში ტელეკომპანია „იბერიაცაა“ ხელისუფლებას ბრალს სდებდა ბიზნესზე ზეწოლასა და ფინანსური პრობლემების შექმნის გზით კრიტიკულად განწყობილი ტელეარხის დახურვაში. საქართველოს მთავრობაში აცხადებდნენ, რომ „ომეგა-ჯგუფის“ მფლობელი ზაზა ოქუაშვილი მედიასაშუალების გამოყენებით და შანტაჟით ცდილობს თავი აარიდოს 50-მილიონიანი საბიუჯეტო დავალიანების გადახდას.

ტელეკომპანია „იბერიის“ საინფორმაციო სამსახურმა მუშაობა 16 ოქტომბერს შეწყვიტა.