კვაჭანტირაძე: პირადობის მოწმობები ნაციონალების ხელისუფლების დროს ბაზებიდან არის ამოღებული

საპარლამენტო უმრავლესობის წევრი ზვიად კვაჭანტირაძე ყალბი პირადობის მოწმებების შესახებ, რომელთა შესახებაც ინფორმაცია "ნაციონალურმა მოძრაობამ" გაავრცელა, Facebook-ზე ეხმიანება.

ზვიად კვაჭანტირაძის განცხადებით, ნაციონალების მიერ გავრცელებული ეს ინფორმაცია მათი მორიგი სიცრუე და ტყუილია. კვაჭანტირაძის თქმით, ყალბი პირადობები, რომელთა შესახებაც დღევანდელ აქციაზე გრიგოლ ვაშაძემ თქვა, გარდაცვლილ ადამიანებს ეკუთვნით.

"მორიგი სიცრუე და ტყუილია ნაციონალური მოძრაობის ბრალდება ე.წ. ყალბ პირადობებთან დაკავშირებით, რომელიც დღეს აქციაზე გრიგოლ ვაშაძემ გააჟღერა.

პირადობის მოწმობები, რომელიც ნაციონალურმა მოძრაობამ გაავრცელა, დადასტურებით გარდაცვლილებს ეკუთვნით და ისინი ჯერ კიდევ მათ ხელისუფლების დროსაა ამოღებული ბაზებიდან ! ოპონენტები გარდაცვილი ადამიანების პირადობებით ცდილობენ, არჩევნების გაყალბების ილუზია შექმნან. ნაციონალური მოძრაობა არჩევნების შემდეგაც აგრძელებს ჩვეულ ტაქტიკას და ხელისუფლებაზე იმის გადმობრალებას, რასაც წლების განმავლობაში თავად სჩადიოდნენ.

არჩევნების ლეგიტიმურობასთან დაკავშირებით, სააკაშვილისა და ნაციონალური მოძრაობის გარდა, არავის, არანაირი კითხვის ნიშანი არ აქვს და იაფფასიანი ტყუილები შეუძლიათ შიდა მოხმარებისთვის დაიტოვონ", - წერს ზვიად კვაჭანტირაძე Facebook-ზე.

სოციალურ ქსელში გავრცელებული ინფორმაციის გამო, ლანჩხუთის საკრებულოს დეპუტატი, ნაციონალური მოძრაობიდან კახა ასკურავა გამოკითხვაზე მთავარ პროკურატურაშია დაბარებული.

ასკურავა აცხადებს, რომ მან ლანჩხუთში გარდაცვლილი ადამიანების პირადობის მოწმობები იპოვა გადაყრილი იპოვა.

ეს პირადობის მოწმობები გრიგოლ ვაშაძემ აქციაზე ტრიბუნიდან აჩვენა შეკრებილებს და ირწმუნებოდა, რომ ხელისუფლებამ გარდაცვლილების პირადობის მოწმობები ლანჩხუთში არჩევნების გასაყალბებლად გამოიყენა.

28 ნოემბერს საქართველოში საპრეზიდენტო არჩევნების მეორე ტური ჩატარდა, რომელზეც ნაციონალური მოძრაობის კანდიდატი გრიგოლ ვაშაძე მმართველი გუნდის მიერ მხარდაჭერილ კანდიდატ სალომე ზურაბიშვილთან თითქმის 20%-იანი სხვაობით დამარცხდა.

საპრეზიდენტო არჩევნების მეორე ტურის საბოლოო შედეგები შეგიძლიათ იხილოთ ამ ბმულზე.