სოსო გიორგაძე განმარტავს, რატომ არის ე.წ. ყალბ პირადობებზე ნაციონალების ინფორმაცია ტყუილი

ე.წ. ყალბი პირადობების შესახებ გავრცელებული ინფორმაცია იყო გადაცემა "იმედი LIVE"-ს ერთ-ერთი თემა, რომლის შესახებაც წამყვანებმა სერვისების განვითარების სააგენტოს ხელმძღვანელთან სოსო გიორგაძესთან ერთად ისაუბრეს.

სოსო გიორგაძემ კიდევ ერთხელ განმარტა, რომ ნაციონალების მიერ დღეს "აღმოჩენილი პირადობის მოწმებები" 2010 წლამდე გარდაცვლილ ადამიანებს ეკუთვნით. მან ასევე თქვა, რომ ამ პირადობის მოწმობებს ძალა არ აქვთ, ვინაიდან მათი მეპატრონეების შესახებ გარდაცვალებაზე ჩანაწერი ოფიციალურად არსებობს. ამასთან, გიორგაძემ განაცხადა, რომ გარდაცვალების მოწმობის ასაღებად, იუსტიციის სახლში აუცილებელი არ არის გარდაცვლილი ადამიანის პირადობის მოწმობის ჩაბარება/წარდგენა. 

"2013 წელს, საქართველოს იუსტიციის მინისტრის გადაწყვეტილებით, შემოღებულია ასეთი წესი,რომლის მიხედვითაც სახელმწიფო სერვისების განვითარების სააგენტო ცესკოს ამომრჩეველთა სიისთვის მხოლოდ სახელს, გვარს, პირად ნომერს და მისამართს კი არ უგზავნის, არამედ ყველა ასეთ მონაცემებს თან ერთვის ბიომეტრიული ფოტოსურათი. თითოეული ჩვენთაგანის, თითოეული ამომრჩევლის მონაცემი, ბიომეტრიული ფოტოსურათით არის გამაგრებული. ეს იმას ნიშნავს, რომ თითოეულ ადამიანს ახლავს ახალი სტანდარტით გადაღებული ფოტოსურათი და ვერცერთი ადამიანი არჩევნებში მონაწილეობას ვერ მიიღებს თუ მისი ფოტოსურათი თან არ ახლავს ამ ამომრჩეველთა სიას. 2013 წლიდან მოყოლებული ასეთი მეთოდებით არჩევნების გაყალბება პრაქტიკულად შეუძლებელია", - განაცხადა სოსო გიორგაძემ "იმედი LIVE"-ის ეთერში და დასძინა, რომ ყალბ პირადობის მოწმებებზე ინფორმაციის გავრცელება გამოყენებული იყო სახელმწიფო ინსტიტუტების წინააღმდეგ.

"ვიზალიბერალიზაციის ფარგლებში, შეფასების მეორე ბლოკი მთლიანად იყო მიმართული სახელმწიფო სერვისების განვითარების კომპეტენციის ფარგლებში და ეფუძნებოდა გაერკვიათ, იყო თუ არა ქართული დოკუმენტები უსაფრთხო. სწორედ ამ ბლოკის ფარგლებში, ევროკავშირიდან მოვლენილმა ექსპერტებმა შეაფასეს რა ქართული დოკუმენტების დამზადების, მოქალაქეებზე მათი გადაცემის, ფლობის, უსაფრთხოების წესები და სტანდარტები, დაწერეს, რომ სახელმწიფო სერვისების განვითარების სააგენტო არის კარგადმართული ორგანიზაცია, სადაც საქართველოს მოქალაქეებისთვის დოკუმენტების დამზადება ხდება უსაფრთხოდ და ევროკავშირის სტანდარტების შესაბამისად",  განაცხადა სოსო გიორგაძემ.

მისი თქმით, საპრეზიდენტო არჩევნების პირველ ტურში დაახლოებით 790 000 ადამიანი იყო ისეთი, რომელსაც ძველი პირადობები ჰქონდა და მათი რაოდენობა მეორე ტურისთვის 13 ათასით შემცირდა. 

მისი თქმით, 2013 წლის შემდეგ დაახლოებით მილიონნახევარ ადამიანზე გაიცა ახალი პირადობის დამადასტურებელი მოწმებები.

ამ საკითხზე სერვისების განვითარების სააგენტომ 2 დეკემბერს სპეციალური განცხადება გაავრცელა და იმ 17-ვე პირადობის მოწმობის მფლობელის შესახებ გაასაჯაროვა ინფორმაცია, რომლებიც ნაციონალებმა წარადგინეს. 

ნაციონალების წევრის მიერ ყალბი პირადობის მოწმებებზე გავრცელბულ ცნობას ტყუილი და სიცრუე უწოდა საპარლამენტო უმრავლესობის წევრმა ზვიად კვაჭანტირაძემაც. 

სოციალურ ქსელში გავრცელებული ინფორმაციის გამო, ლანჩხუთის საკრებულოს დეპუტატი, ნაციონალური მოძრაობიდან კახა ასკურავა გამოკითხვაზე მთავარ პროკურატურაშია დაბარებული.

ასკურავა აცხადებს, რომ მან ლანჩხუთში გარდაცვლილი ადამიანების პირადობის მოწმობები იპოვა გადაყრილი იპოვა.

ეს პირადობის მოწმობები გრიგოლ ვაშაძემ აქციაზე ტრიბუნიდან აჩვენა შეკრებილებს და ირწმუნებოდა, რომ ხელისუფლებამ გარდაცვლილების პირადობის მოწმობები ლანჩხუთში არჩევნების გასაყალბებლად გამოიყენა.

28 ნოემბერს საქართველოში საპრეზიდენტო არჩევნების მეორე ტური ჩატარდა, რომელზეც ნაციონალური მოძრაობის კანდიდატი გრიგოლ ვაშაძე მმართველი გუნდის მიერ მხარდაჭერილ კანდიდატ სალომე ზურაბიშვილთან თითქმის 20%-იანი სხვაობით დამარცხდა.

საპრეზიდენტო არჩევნების მეორე ტურის საბოლოო შედეგები შეგიძლიათ იხილოთ ამ ბმულზე.