ოპოზიცია მიიჩნევს, რომ პრეზიდენტის ადმინისტრაციას დაფინანსების შემცირებას პოლიტიკური ქვეტექსტი აქვს

ევროპულ საქართველოში მიაჩნიათ, რომ პრეზიდენტის ადმინისტრაციას დაფინანსების შემცირებას პოლიტიკური ქვეტექსტი აქვს. ირაკლი აბესაძის განცხადებით, ამ გადაწყვეტილებით მტკიცდება, რომ ქართულ ოცნების სურვილია პრეზიდენტი ნომინალური ფიგურა იყოს.

„ამით მტკიცდება, რომ მათი სურვილია პრეზიდენტი იყოს ნომინალური ფიგურა, რომელსაც არ ექნება ფინანსური დამოუკიდებლობა და შეზღუდული იქნება საკუთარ აქტივობებში.მათ არ სჭირდებათ ახალი დამოუკიდებელი პოლიტიკური ფიგურა საქართველოში“, - აცხადებს აბესაძე.

რაც შეეხება უმრავლესობას, საფინანსო საბიუჯეტო კომიტეტის თავმჯდომარე აცხადებს, რომ საბოლოო გადაწყვეტილებამდე იქნება კონსულტაციები არჩეულ პრეზიდენტთან.

„მე ვფიქრობ რომ ახალი კონსტიტუციიდან გამომდინარე პრეზიდენტის ადმინისტრაციის დაფინანსება არის შესაბამისობებში პრეზიდენტის ფუნქციებთან და ვალდებულებებთან.თუმცა საბოლოო გადაწყვეტილების მიღებამდე ვაპირებ დამატებითი კონსულტაციები გავიარო არჩეულ პრეზიდენტთან და მის წარმომადგენელთან - ლაშა ჟვანიასთან. ამის შემდეგ მივიღებთ საბოლოო გადაწყვეტილებას", - განმარტავს ირაკლი კოვზანაძე.

საქართველოს ახლადარჩეული პრეზიდენტი სალომე ზურაბიშვილი 2019 წელს პრეზიდენტის ადმინისტრაციის ხარჯების შემცირებასთან დაკავშირებით აცხადებს, რომ ეს საბიუჯეტო პროცესია და არავითარი პრობლემა არაა.

2019 წლის სახელმწიფო ბიუჯეტის პროექტის ბოლო ვერსიით, რომელიც პარლამენტს უკვე გადაეგზავნა, პრეზიდენტის ადმინისტრაციის დაფინანსება 3 მილიონ 800 ათასი ლარით მცირდება. ბიუჯეტის პროექტის მიხედვით, ადმინისტრაციის დაფინანსება 6 მილიონი ლარი იქნება.

ასევე, 140-დან 60-მდე მცირდება ადმინისტრაციაში დასაქმებულთა რაოდენობა.

პროექტში გათვალისწინებული აღარ არის საქართველოს პრეზიდენტის სარეზერვო ფონდი, რომელიც ბოლო წლებში 5 მლნ ლარი იყო.