ენერგოომბუდსმენი: მცდარია ინფორმაცია, რომ კომუნალური მომსახურება არ შეწყდება თუ ბინაში ვინმე ცხოვრობს

ენერგოომბუდსმენი გამოეხმაურა სოციალურ ქსელში გავრცელებულ ინფორმაციას, თითქოს მოქალაქეებს კომუნალურ მომსახურებას აღარ შეუწყვეტენ, თუ სახლში ვინმე ცხოვრობს. გავრცელებული განცხადების მიხედვით, ინფორმაცია სიმართლეს არ შეესაბამება. 

„სოციალურ ქსელში ერთ-ერთი მოქალაქის მიერ გავრცელებულმა სტატუსმა ენერგეტიკის სექტორის მომხმარებლებისთვის ბევრი შეკითხვა გააჩინა, რის გამოც ენერგოომბუდსმენის აპარატი თავს ვალდებულად თვლის, განმარტოს არსებული ვითარება. 

გავრცელებული ინფორმაციის თანახმად, მოქალაქემ მიუთითა: ,,ბატონებო! სააპელაციო სასამართლომ პრეცენდენტული გადაწყვეტილება მიიღო. გაზის და დენის ჩაჭრა დაუშვებელია თუ ბინაში ვინმე ცხოვრობს“.

საკითხის სიღრმისეული შესწავლის შედეგად, გავარკვიეთ, რომ ეს სტატუსი ეხება ერთ კონკრეტულ სიტუაციას, არის კონტექსტიდან ამოგლეჯილი და შესაბამისად, არ შეესაბამება სინამდვილეს. ბატონი მიუთითებს ისეთ შემთხვევაზე, როდესაც საცხოვრებელი ფართის მესაკუთრეს სურს კომუნალური მომსახურების შეწყვეტა საკუთრების დაცვის ბერკეტად და ფაქტობრივი მფლობელების და ამ ფართში მცხოვრები აქტიური მომხმარებლების სადამსჯელო ღონისძიებად გამოიყენოს. 

ენერგოომბუდმენი მიმართავს მოქალაქეებს, ენერგეტიკის სექტორის მომხმარებლებს, რომ არ დაიბნენ გავრცელებული ინფორმაციით, რადგან ბუნებრივი გაზის სექტორში მომხმარებელსა და გამანაწილებელ კომპანიას შორის ურთიერთობები რეგულირდება სემეკის მიერ დადგენილი ნორმატიული აქტით. 

„მომხმარებელი ვალდებულია, დროულად გადაიხადოს მიმდინარე გადასახადი, წინააღმდეგ შემთხვევაში, კომპანია უფლებამოსილია შეწყვიტოს მომსახურება. ამ მხრივ არაფერი შეცვლილა, შესაბამისად, ვალდებულების შეუსრულებლობა გამოიწვევს კომუნალური მომსახურების შეწყვეტას, რაც უარყოფითად აისახება ჩვენ მომხმარებლებზე“ - წერია განცხადებაში. 

დღეს სოციალურ ქსელში გავრცელებულ პოსტზე დაყრდნობით, სხვადასხვა სააგენტოებმაც გაავრცელეს მცდარი ინფორმაცია, რასაც სოცქსელების მომხმარებელთა აქტიური გამოხმაურება მოჰყვა.