ზუგდიდში სკოლის დირექტორის გარდაცვალების ფაქტს ირაკლი კობახიძე ეხმაურება

ზუგდიდში სკოლის დირექტორის გარდაცვალების ფაქტს პარლამენტის თავმჯდომარე ეხმაურება. ირაკლი კობახიძის განცხადებით, იმ შემთხვევაში თუ ზუგდიდის მე-6 საჯარო სკოლის დირექტორის ია კერზაიას გარდაცვალებასთან დაკავშირებით კითხვები არსებობს, მას პასუხს ხელისუფლების შესაბამისი ორგანოები გასცემენ. მის განცხადებას „აიპრესი“ ავრცელებს.

“პირველ რიგში მინდა გარდაცვლილის ოჯახს მივუსამძირმო. რაც შეეხება ამ კონკრეტულ შემთხვევას, იქ თუ რაიმე კითხვის ნიშნები არის და თუ ოჯახს აქვს კითხვის ნიშნები, პასუხისმგებლობა არის ხელისუფლების შესაბამისი ორგანოების და ამ კითხვებს პასუხი გაეცემა, დარწმუნებული ვარ”, - განმარტა კობახიძემ.

ოჯახის მტკიცებით, სკოლის დირექტორის, ია კერზაიას ჯანმრთელობის მდგომარეობა მას შემდეგ გართულდა, რაც ის თანამდებობიდან გაათავისუფლეს. მანამდე კი, მათივე მტკიცებით, ქალმა მმართველი პარტიის მიერ მხარდაჭერილი სალომე ზურაბიშვილის აქტივისტობაზე უარი თქვა.

პედაგოგის შვილი, ბაჩანა შენგელია ღიად აცხადებდა, რომ ია კერზაია რეპრესიებისა და პოლიტიკური დევნის მსხვერპლია. მისი თქმით, ზეწოლა განათლების მინისტრისგან მოდიოდა და მიზანი დაშინება იყო.

განათლების სამინისტრო განმარტავდა, რომ ზუგდიდის მე-6 საჯარო სკოლა მოქალაქის განცხადების საფუძველზე 9-დან 15 ნოემბრის ჩათვლით შემოწმდა. გამოვლინდა ადმინისტრაციული, ფინანსური და სანიტარიულ-ჰიგიენური მძიმე დარღვევები. დასკვნა კი შემდგომი რეაგირებისთვის სკოლის სამეურვეო საბჭოს გაეგზავნა.

ამავე ცნობით, სკოლის დირექტორის, ია კერზაიას თანამდებობიდან გათავისუფლების შესახებ გადაწყვეტილება საბჭომ არ მიიღო და ის სკოლის მოქმედი დირექტორი იყო.