კალაძე: ბაღების აღსაზრდელების საკვებთან დაკავშირებით რუსთავი 2 ტყუის

თბილისის მერი კახა კალაძე ტელეკომპანია "რუსთავი 2"-ს ცრუ ინფორმაციის გავრცელებაში ადანაშაულებს. როგორც კალაძემ მთავრობის სხდომაზე განაცხადა, ინფორმაცია იმის შესახებ, რომ ბაგა-ბაღების 61 ათასი აღსაზრდელი საკვების გარეშე დარჩა, სიმართლე არაა. 

"მინდა შევეხო ისევ და ისევ ტელეკომპანია "რუსთავი 2"-ის სიცრუეებს. ვერ ავუდივართ. მთავრობის სხდომას ვერ ვატარებთ, რომ არ მოგვიწიოს პასუხის გაცემა სიცრუის მანქანაზე, იმ ტყუილზე, რომელსაც ისინი ახორციელებენ სხვადასხვა მიმართულებით. მინდა მოვუწოდო ყველა სახელმწიფო უწყებას, რომ არც ერთი სიცრუე და ტყუილი არ გაატარონ, რადგან ამას ისმენს მოსახლეობა და ბევრს შემდეგ ეს სიმართლე ჰგონია. ყველა ტყუილზე უნდა იყოს რეაგირება, უნდა იყოს ნათქვამი სიმართლე. სხვათა შორის, კვლევა იყო ამაზე გაკეთებული და "რუსთავი 2"-ის ინფორმაციის 79% თუ 80% არის სიცრუე, რამდენიმე დღის წინ გაკეთდა სიუჟეტი, სადაც საუბარი იყო, რომ თითქოს 61 ათასი ბაღის აღსაზრდელი დარჩა საკვების გარეშე, სრულიად გაუგებარია, საიდან მოაქვთ ეს ინფორმაცია. ეს არის ძალიან დიდი ტყუილი", - განაცხადა კალაძემ.

მისივე თქმით, სიუჟეტი ეთერში 6 დეკემბერს გავიდა, კვების ტენდერი კი 4 დეკემბერს იყო გამოცხადებული. 

„ტენდერი დღეს მთავრდება და გამარჯვებული კომპანია სწორედ დღეს გახდება ცნობილი. ახლაც კი შეუძლებელია, მასში მონაწილეების ვინაობა ვნახოთ, რადგან ტენდერი დახურულია. გამარჯვებული კომპანია პროცედურების დასრულების შემდეგ გვეცოდინება. ამიტომ, კიდევ ერთხელ მოვუწოდებ ტელეკომპანია „რუსთავი 2“-ს, თავი დაანებონ მოსახლეობის შეცდომაში შეყვანის მცდელობას. ჩვენ ამის შესაძლებლობას არ მივცემთ. მე, პირადად, ვალდებული ვარ ჩვენი მოსახლეობის, ამომრჩევლის წინაშე, ყოველთვის სწორი ინფორმაცია მივაწოდო მათ და წვდომა ჰქონდეთ იმ საკითხებზე, რომელსაც დედაქალაქის მერია ახორციელებს“, - განაცხადა კახა კალაძემ. 

თბილისის მერი საახალწლო ღონისძიებებთან დაკავშირებულ გუშინდელ სიუჟეტსაც გამოეხმაურა, სადაც, მისი თქმით, საუბარი იყო, თითქოს, მერია საახალწლო სცენის მოწყობაში  2 მლნ ლარს ხარჯავს. 

„დღეს მე წამოვიღე ამ ტელევიზიით გამოდმოცემული მასალის „სქრინები“. ეს იმ ტენდერების „სქრინებია“, რომლებზეც გუშინ გვიმტკიცებდნენ, რომ სცენის მოწყობაზე, გადახურვაზე და ა.შ. 2 მლნ იხარჯება. მოცემული ციფრები რომ დავაჯამოთ, დაახლოებით, 1 მლნ 61 ათასი ლარი გამოდის. საიდან მოიტანეს 2 მლნ ლარი, გაუგებარია. ასევე, მნიშვნელოვანია, რომ სატენდერო დოკუმენტაციაში პირდაპირ არის მითითებული, რომ ეს არის ტენდერი სცენაზე, მოწყობილობებზე, რომელიც 2018-2019 წლებში ჩასატარებელი ღონისძიებებისთვისაა საჭირო. ჩვენ ძალიან ბევრ ღონისძიებას ვატარებთ, რომელთა შორისაა, „თბილისობა“, 26 მაისის დღესასწაული, პროექტი „თბილისის ცის ქვეშ“, პროექტი „თბილისი“, ეს მოწყობილობები კი, ყველა ამ ღონისძიებას მთელი წლის განმავლობაში უნდა მოემსახუროს. „რუსთავი 2“-ს მოსახლეობა შეცდომაში შეყავს, თითქოს 2 მლნ იხარჯება იმისთვის, რომ საახალწლოდ სცენა მოვაწყოთ და გადავხუროთ. შეიძლება, კახა კალაძე ან „ქართული ოცნება“ არ მოგწონდეს, მაგრამ ეს დამოკიდებულება კატეგორიულად მიუღებელია“, - განაცხადა კახა კალაძემ.