რომან კაკულია: დეპუტატების ნაწილმა საბაჟო კოდექსის კანონპროექტის გაცნობა ვერ მოასწრო

დარგობრივი ეკონომიკის პოლიტიკის კომიტეტის თავმჯდომარე რომან კაკულია საბაჟო კოდექსთან დაკავშირებით ამბობს, რომ დეპუტატების დიდმა ნაწილმა კანონპროექტის სრულყოფილად გაცნობა ვერ მოასწრო. შესაბამისად, კაკულია მთავრობას მოუწოდებს, ასეთ საკითხებს მეტი პასუხისმგებლობით მიუდგნენ. მის კომენტარს 1tv.ge ავრცელებს.

რომან კაკულიას განცხადებით, კანონპროექტის ძირითადი პრინციპები დადებითია, ის ფიქრობს, რომ კოდექსი რაც უფრო ჩქარა ამოქმედდება, ბიზნესოპერატორებისთვის მით უფრო კარგი იქნება.

"მთავრობას მოვუწოდებ, უფრო მაღალი პასუხისმგებლობით მიუდგეს გადაწყვეტილებებს, როდესაც დეპუტატების მიმართ ასეთი თხოვნა აქვს. ალბათ ისინი ფიქრობენ, რომ დეპუტატებისგან არავითარი მაღალი ხარისხის კომპეტენტური შენიშვნები არ იქნება ან სხვა რამეს ფიქრობენ. მაშინ ამას სულ სხვა პრობლემასთან მივყავართ, რაც ადრე თუ გვიან, თავს ამოყოფს და სჯობს, ამას დროზე მივხედოთ", –  განაცხადა რომან კაკულიამ.

დეპუტატის თქმით, მან კანონპროექტის მხარდაჭერაზე პოლიტიკური გადაწყვეტილება მიიღო.

„მე პოლიტიკური გადაწყვეტილება მივიღე, რადგან წამყვანი კომიტეტისთვის განხილვის ვალდებულება არ შეგვეჩერებინა, რადგან ასეთი თხოვნა იყო, მაგრამ ვუთხარი, თუ უფრო მეტად არ დაკონკრეტდებიან, გადაწყვეტილების დაჩქარების აუცილებლობის ნაწილში, მაშინ სესიაზე ამ პროექტს ჩემი მხრიდან მხარდაჭერა არ ექნება“, – განაცხადა რომან კაკულიამ.

კანონპროექტთან დაკავშირებით ფინანსთა მინისტრის მოადგილემ ლაშა ხუციშვილმა განაცხადა, რომ საბაჟო კოდექსი 1 იანვრიდან სავარაუდოდ ვერ ამოქმედდება.

დღეს დარგობრივი ეკონომიკის კომიტეტის სხდომა, რომელზეც საბაჟო კოდექსის პროექტს განიხილავდნენ ხმაურით დაიწყო. ოპოზიციამ კანონპროექტის განხილვის გადადება მოითხოვა. 

საკანონმდებლო პაკეტი 32 კანონპროექტისგან შედგება, თავად „საბაჟო კოდექსი“ კი - 33 თავისა და 214 მუხლისგან. პრემიერმინისტრის მამუკა ბახტაძის თქმით, საქართველოს ახალი საბაჟო კოდექსი უპასუხებს იმ გამოწვევებს, რაც დღეს არის.

კანონპროექტის მიზანია კანონმდებლობის დაახლოება ევროკავშირის შესაბამის რეგულაციებთან და საქართველოში ევროკავშირის მსგავსი საბაჟო პროცედურების დანერგვა, რაც ფინანსთა სამინისტროს მოსაზრებით, საქართველოსა და ევროკავშირს შორის საგარეო ვაჭრობასთან დაკავშირებულ საბაჟო პროცედურებს გაამარტივებს და მეწარმეებისთვის ერთნაირ საბაჟო რეგულირების გარემოს შექმნის.