ადვოკატი ზვიად გამსახურდიას საქმეზე სპეციალური საგამოძიებო ჯგუფის შექმნას მოითხოვს

საქართველოს პირველი პრეზიდენტის ოჯახის ადვოკატი საგამოძიებო უწყებებს უნდობლობას უცხადებს.

ის ამბობს, რომ აქამდე ჩატარებული ყველა საგამოძიებო მოქმედება საზოგადოების მოლოდინებს ვერ აკმაყოფილებს. აქედან გამომდინარე, ამირან გიგუაშვილი გამსახურდიას მკვლელობის საქმეზე სპეციალური საგამოძიებო ჯგუფის შექმნას მოითხოვს.

მისი განცხადებით, საქმეს ზედამხედველი პროკურორი უნდა გაუძღვეს, რომელიც ოჯახის ნდობით აღჭურვილი პირი იქნება. 

ზვიად გამსახურდიას მკვლელობის საქმის გამოძიების შესაძლო შეწყვეტის გამო კონსტანტინე და ცოტნე გამსახურდიებმა მთავარი პროკურატურის მისაღებში შიმშილობა 11 დღის წინ დაიწყეს.

31 დეკემბერს საქართველოს პირველი პრეზიდენტის გაურკვეველ ვითარებაში გარდაცვალების ფაქტზე 25-წლიანი ხანდაზმულობის ვადა იწურება. საქმის ხანდაზმულობის ვადის გაგრძელებაზე პარლამენტი დღეიდან დაჩქარებულად იმსჯელებს.

21 დეკემბერს სალომე ზურაბიშვილმა პარლამენტს მიმართა, გაეთვალისწინებინა თხოვნა, რომ ზვიად გამსახურდიას მკვლელობის გამოძიების ხანდაზმულობის ვადა გაგრძელებულიყო.

საქართველოს პირველი პრეზიდენტი ზვიად გამსახურდია 1993 წლის 31 დეკემბერს, გამთენიისას, სამეგრელოს სოფელ ხიბულაში გაურკვეველ ვითარებაში გარდაიცვალა.