იუსტიციის საბჭოს არამოსამართლე წევრების შეთავაზებას საპარლამენტო უმრავლესობა პასუხობს

იუსტიციის უმაღლესი საბჭოს არამოსამართლე წევრების ანა დოლიძისა და ნაზი ჯანეზაშვილის საკანონმდებლო შეთავაზებას საპარლამენტო უმრავლესობა პასუხობს. იუსტიციის უმაღლესი საბჭო, უზენაესი სასამართლოს წევრობის კანდიდატების სრული კონსენსუსით შერჩევის იდეა საპროცედურო საკითხთა კომიტეტის თავმჯდომარის პირველი მოადგილისთვის, გურამ მაჭარაშვილისთვის მიუღებელია.

საპარლამენტო უმრავლესობის წევრი ამბობს, რომ ასეთი პრაქტიკა არც ერთ ქვეყანაში არ არსებობს.

რაც შეეხება პარლამენტის თავმჯდომარისა და იუსტიციის უმაღლესი საბჭოს მდივნის შეხვედრას -  საპროცედური კომიტეტის თავმჯდომარის მოადგილე აცხადებს, რომ ასეთი შეხვედრები მხოლოდ  მისასალმებელია:

"რასაც ზოგიერთი ე.წ. კლანურ მმართველობას უწოდებს, ამას თავისუფლად შეიძლება ვუწოდოთ გუნდური მუშაობა, იმიტომ რომ ესენი არიან პარლამენტის თავმჯდომარე და იუსტიციის საბჭოს მდივანი. ნაცვლად იმისა, რომ მივესალმებოდეთ ამ ორი უწყების ხელმძღვანელების შეხვედრას, ზუსტად იმ საკითხზე რაც საზოგადოებას აწუხებს, ნეგატიურ კომენტარებს ვისმენთ", - თქვა მაჭარაშვილმა.

იუსტიციის საბჭოს არამოსამართლე წევრის ანა დოლიძის განცხადებით, მან მედიით შეიტყო პარლამენტის თავმჯდომარის, ირაკლი კობახიძისა და გიორგი მიქაუტაძის შეხვედრის შესახებ.

„ეს შეხვედრა აღიქმება, როგორც თავმჯდომარის მიერ კლანის მხარდაჭერა. ეს შეხვედრა ჩვენთვის მიუღებელია“, - თქვა ანა დოლიძემ.

ნაზი ჯანეზაშვილი კი აცხადებს, რომ პარლამენტმა უნდა მიიღოს საკანონმდებლო ცვლილებები, რაც პარლამენტს მისცემს შანსს აირჩიოს მხოლოდ ღირსეული მოსამართლეები. ამ ცვლილებებით მოსამართლეების დანიშვნა უნდა მოხდეს იუსტიციის საბჭოს ყველა წევრის მხარდაჭერით.