ანა დოლიძე და ნაზი ჯანეზაშვილი ვეტოს უფლებას მოითხოვენ

იუსტიციის საბჭოს არამოსამართლე წევრებმა - ანა დოლიძემ და ნაზი ჯანეზაშვილმა საგანგებო ბრიფინგი გამართეს. ანა დოლიძის განცხადებით, მან მედიით შეიტყო პარლამენტის თავმჯდომარის, ირაკლი კობახიძისა და გიორგი მიქაუტაძის შეხვედრის შესახებ.

„ეს შეხვედრა აღიქმება, როგორც თავმჯდომარის მიერ კლანის მხარდაჭერა. ეს შეხვედრა ჩვენთვის მიუღებელია“, - აცხადებს ანა დოლიძე.

ნაზი ჯანეზაშვილი კი აცხადებს, რომ პარლამენტმა უნდა მიიღოს საკანონმდებლო ცვლილებები, რაც პარლამენტს მისცემს შანსს აირჩიოს მხოლოდ ღირსეული მოსამართლეები. ამ ცვლილებებით მოსამართლეების დანიშვნა უნდა მოხდეს იუსტიციის საბჭოს ყველა წევრის მხარდაჭერით.

დღეისათვის გადაწყვეტილება საბჭოს წევრთა უმრავლესობით მიიღება.

მიქაუტაძესთან შეხვედრის შესახებ ირაკლი კობახიძემ განმარტება გუშინ გააკეთა. მისი თქმით, იუსტიციის საბჭო კონსტიტუციური ორგანოა, რომელიც მართლმსაჯულების სისტემაში პროცესების კოორდინაციაზეა პასუხისმგებელი და აქედან გამომდინარე, პარლამენტსა და იუსტიციის უმაღლეს საბჭოს შორის თანამშრომლობას პრინციპული მნიშვნელობა აქვს.

24 დეკემბერს იუსტიციის უმაღლესმა საბჭომ უზენაეს სასამართლოში წარსადგენ მოსამართლეთა 10 კანდიდატურა დაასახელა.

კანდიდატები არიან: მარიამ ცისკაძე, ნინო ქადაგიძე, მიხეილ ჩინჩალაძე, პაატა სილაგაძე, დიმიტრი გვრიტიშვილი, მერაბ გაბინაშვილი, ნინო სანდოძე, თამარ ალანია, გიორგი ტყავაძე და გიორგი მიქაუტაძე.

სიამ პოლიტიკურ და საზოგადოებრივ წრეებში კრიტიკა გამოიწვია. 26 დეკემბერს ცნობილი გახდა, რომ პარლამენტი უზენაესი სასამართლოს მოსამართლეების განწესების გადაწყვეტილებას მიმდინარე სესიაზე არ მიიღებს.

თუმცა, 27 დეკემბერს იუსტიციის საბჭომ 6 მოსამართლე უვადოდ დანიშნა, რომელთა შორის გირგვლიანის და სულხან მოლაშვილის საქმეების მოსამართლე ლევან მურსუიძეცაა. პარლამენტის ვიცესპიკერის, თამარ ჩუგოშვილის თქმით, ეს იუსტიციის საბჭოს პასუხი იყო პარლამენტის 26 დეკემბრის გადაწყვეტილებაზე.