ლევან გოგიჩაიშვილმა თანაგუნდელები ფოფხაძის გაწვევის გამო გააკრიტიკა

პარლამენტის თავმჯდომარე ეკა ბესელიას იურიდიული კომიტეტის თავმჯდომარის პოსტიდან წასვლას პოლიტიკური სპეკულაციის ნაწილად განიხილავს. ეს განცხადება ირაკლი კობახიძემ ბიუროს სხდომაზე მას შემდეგ გააკეთა, რაც თანაგუნდელები ლევან გოგიჩაიშვილმა გედევან ფოფხაძის იურიდიული კომიტეტიდან გაწვევის გამო გააკრიტიკა.

„ორი მიზეზი ჰქონდა ამ გადაწყვეტილებას. ერთი იყო რეგლამენტის უხეში დარღვევა და ყველა კვალიფიციური იურისტი თანხმდება იმაზე, რომ რეგლამენტის უხეში დარღვევით იყო არჩეული კომიტეტის თავმჯდომარის პირველი მოადგილის პოსტზე. მეორე საკითხი არის გუნდურობა. გუნდში იყო ეს განსახილველი საკითხი. ამ ორი მიზეზით იყო გადაწყვეტილება მიღებული. არ არსებობს რეგლამენტის თანახმად ინსტანცია, რომელიც დაადგენს კომიტეტში თავმჯდომარის პირველი მოადგილის არჩევის ლეგიტიმურობას. აქედან გამომდინარე, ეს ხარვეზი უნდა გამოესწორებინა ფრაქციას.

რაც შეეხება ეკა ბესელიას და გედევან ფოფხაძის თანამდებობიდან წასვლის დაკავშირებას მოსამართლეების საკითხთან, ეს არის ან ინფორმაციის არქონის შედეგი, ან პოლიტიკური სპეკულაცია. იმედი მაქვს, რომ ეს იყო ინფორმაციის არქონის შედეგი“, - განაცხადა კობახიძემ.

რაც შეეხება ბიუროს სხდომაზე ლევან გოგიჩაიშვილის მიერ გაკეთებულ განცხადებას, ქართული ოცნების წევრმა იურიდიული კომიტეტიდან გედევან ფოფხაძის გაწვევა უზენაესი სასამართლოს მოსამართლეების სიას დაუკავშირა და აღნიშნა, რომ ეს საკითხი არის წყალგამყოფი „ქართული ოცნების“ იმ წევრებს შორის, რომლებიც მოსამართლეთა ამ სიის წინააღმდეგი და მომხრე არიან.

„არ ვფიქრობ, რომ გედევან ფოფხაძის საკითხი იყო პროცედურების დარღვევა. ეს უკავშირდება იმას, რომ ჩვენ არ გვსურს სააკაშვილ-ადეიშვილის მოსამართლეები ვიხილოთ უვადოდ უზენაეს სასამართლოში. თქვენ იცოდით, რომ იურიდიული კომიტეტი ამ საკითხს ჩააგდებდა და შესაბამისად, იურიდიულმა კომიტეტმა პარლამენტი არ დააყენა უხერხულობის წინაშე. რაც არ უნდა გადაადგილებები გააკეთოთ, ამ პარლამენტში, მე ღრმად ვარ დარწმუნებული, რომ სააკაშვილის და ადეიშვილის ჯალათი მოსამართლეები უზენაესი სასამართლოს მოსამართლეები ვერ გახდებიან. ჩინჩალაძე, მურუსიძე, ჯალათი მოსამართლეები, რომლებმაც უამრავი ადამიანის ცხოვრება დაღუპეს, ამ ადამიანებს ეს პარლამენტი ვერ აირჩევს. ეს პარლამენტი არის 2012 წლის 1-ლი ოქტომბრის მემკვიდრეობა. ამ პარლამენტში ეს სია არ უნდა გავიდეს. როდესაც მოხდება კრიტერიუმების დადგენა, ამ კრიტერიუმებმა უნდა იმოქმედოს სააპელაციო სასამართლოზე", - განაცხადა გოგიჩაიშვილმა ბიუროს სხდომაზე.

დღეს ცნობილი გახდა, რომ გედევან ფოფხაძე ფრაქცია „ქართულმა ოცნებამ“ იურიდიული კომიტეტის პირველი მოადგილის თანამდებობიდან გაიწვია. როგორც მდინარაძემ თქვა, ამ გადაწყვეტილებას ბიძინა ივანიშვილიც დაეთანხმა. 

ეკა ბესელიამ გედევან ფოფხაძის გაწვევას მდინარაძის მხრიდან სადამსჯელო აქტი უწოდა.

ფოფხაძე 31 დეკემბერს იურიდიულ საკითხთა კომიტეტის თავმჯდომარის პირველ მოადგილედ აირჩიეს, რომელსაც კომიტეტის თავმჯდომარის მოვალეობაც უნდა შეესრულებინა.ეკა ბესელიამ გადადგომის შესახებ განცხადება 27 დეკემბერს გააკეთა.

რეგლამენტით, თავმჯდომარის მოვალეობა პირველმა მოადგილემ უნდა შეასრულოს, რომელსაც კომიტეტის უმრავლესობა აირჩევს. ეს თანამდებობა კი მას შემდეგ გახდა ვაკანტური, რაც ეკა ბესელიას გადადგომის შემდეგ პოსტი საკუთარი სურვილით ვანო ზარდიაშვილმაც დატოვა.