ვიცემერმა დაასახელა ფაქტორები, რომლითაც დიდი დიღმის მსგავსი ტრაგედიის არიდებაა შესაძლებელი

თბილისის ვიცემერი ირაკლი ხმალაძე ამბობს, რომ დიდ დიღომში, აფეთქებისას დაზიანებულ კორპუსზე ლაბორატორიული და ექსპერტული კვლევები დასრულდა. შედეგად დადგინდა, რომ კორპუსი საცხოვრებლად ვარგისია, არ დაზიანებულა მზიდი კონსტრუქციები. თუმცა, როგორც ხმალაძე ამბობს, საცხოვრებელ კონდიციამდე მისაყვანად აუცილებელია აღდგენითი სამუშაოები, რომელსაც თბილისის მერია განახორციელებს. ამის შესახებ ირაკლი ხმალაძემ "ქრონიკის" ეთერში თქვა.

ირაკლი ხმალაძის თქმით, რეაბილიტაცია მას შემდეგ დაიწყება, რაც შენობაში საგამოძიებო და კვლევითი სამუშაოები დასრულდება. მისი განმარტებით, კონტრაქტორი კომპანიები უკვე მზად არიან სამუშაოების დასაწყებად, რომელსაც თბილისის მერია დააფინანსებს.

რაც შეეხება უსაფრთხოებასთან დაკავშირებით დამატებითი რეგულაციების შემოღებას, ირაკლი ხმალაძის განცხადებით, რეგულაციები ასეთ პრობლემებს ვერ გადაჭრის, რადგან ასეთი რეგულაციების შემოღებამდე, ხმალაძის თქმით, აუცილებელია მოქალაქეებმაც გაიაზრონ თავიანთი წილი პასუხისმგებლობა და შეამოწმებინონ გაზგამანაწილებელ კომპანიებს მათი დანადგარები.

"რომ მივაღწიოთ იდეალურ უსაფრთხოებას ამას მხოლოდ რეგულაციების შემოღებით ვერ ვიზამთ. ჩვენ რომ მივიღოთ უსაფრთხოების საკმარისი დონე, საჭიროა რამდენიმე კომპონენტი: რეგულაცია, მომსახურების მაღალი დონე და ჩვენც დაკვირვებულები უნდა ვიყოთ", - განაცხადა ირაკლი ხმალაძემ.

თბილისის ვიცემერმა ასევე განაცხადა, რომ დეკემბრის დასაწყისში ფონიჭალაში აფეთქების შედეგად დაზიანებული საცხოვრებელი კორპუსის აღდგენითი და გამაგრებითი სამუშაოები უკვე მიმდინარეობს. 

შსს-მ დიღომში აფეთქების ფაქტზე „ყაზტრანსგაზის“ ორი თანამშრომელი, 28 წლის თორნიკე ტატიშვილი და 62 წლის ვაზელ მამადიანი დააკავა. მათ ბრალი სამსახურებრივი გულგრილობის ბრალდებით წარუდგინეს. ისინი თავს დამნაშავედ არ ცნობენ.

დიდ დიღომში, ავთანდილის ქუჩის 8 ნომერში მდებარე საცხოვრებელ კორპუსში აფეთქება 16 იანვარს, საღამოს მოხდა. შედეგად 4 ადამიანი დაიღუპა, მათ შორის ერთი მცირეწლოვანი ბავშვია. 4 წლის ბიჭის გადარჩენა ექიმებმა ვერ შეძლეს. აფეთქებისას დაშავდა 8 ადამიანი.