რომელი სასულიერო პირები გამოირჩევიან პოლიტიკური განცხადებებით

სასულიერო პირები პოლიტიკურ პროცესებში სულ უფრო ხშირად ერთვებია. სახელწიფო საქმეებში ჩარევის სურვილს მაღალი სასულიერო იერარქიის მქონე პირები პირდაპირ ამბიონიდან გამოთქვამენ. მათ შესახებ სიუჟეტი "იმედის კვირამ" მოამზადა.

ეკლესიის ავტორიტეტს ძირითადად საკუთარი, პირადი გავლენების გასაძლიერებლად ან შესანარჩუნებლად იყენებენ. მაგალითად, მეუფე იაკობი შს მინისტრ გიორგი გახარიას შესახებ ამბობდა:  

"გახარია ჩემთვის მოსკოვის კაცია. თუ რამე წინსვლა ზევით დაიწყო ჩამოვაგდებ. ვერ გახდება ის. თუ მაგი გახდა ეკლესიასთან მთავრობას დიდი პრობლემა ექნება", - ამბობდა მეუფე იაკობი შს მინისტრზე.

კრიტიკის უფლება, ისევე როგორც საკუთარი აზრის დაფიქსირების უფლება, მათ შორის პოლიტიკურის სასულიერო პირებსაც აქვთ, მაგრამ საქართველოში ხშირად ავიწყდებათ რომ ეკლესიისა და სახელწიფოს ურთიერთობები ერთმანეთსიგან გამიჯნულია.

კანონიკური სამართლის სპეციალისტი, თეოლოგი ლადო ნარსია ამბობს, რომ სასულიერო იერარქის, ბოდბელი ეპისკოპოსის იაკობის მუქარა სახელწიფომ რეაგირების გარეშე არ უნდა დატოვოს და მეუფე სულ ცოტა დაკითხვაზე უნდა დაიბაროს.

"ესა არის უკიდურესად აღმაშფოთებელი და საყურადღებო საქმეა. იერარქების გამოხტომებს რეაგირება უნდა მოჰყვეს. დაუშვებელია, რომ მოქმედ მინისტრს ასე იხსნიებდეს ეპისკოპოსი და სახელწიფო არ რეაგირებდეს. ეპისკოპოსი პირდაპირ ამბობს რომ მის უკან უშიშროება დგას. უნდა დაიბარონ და კითხონ რა ინფო აქვს გახარიაზე, რაზე მიანიშნებს, რა იცის და საიდან იცის. რასთან გვავქვს საქმე? მას აქვს უშიშროებასთან და სპეცსამსახურებთან კავშირი", - ამბობს თეოლოგი.

რა ინფორმაციას ფლობს ქვეყნის შინაგან საქმეთა მინისტრზე სინოდის ერთ-ერთ ყველაზე გავლენიანი პირი და როდიდან არჩევენ სასულიერო პირები ვინ უნდა დაინიშნოს პოლიტიკურ თანამდებობაზე, ამაზე  პატრიარქის ქორეპისკოპოსმა საუბარი არ ისურვა.

"იმედის კვირის" ინფორმაციით, ქორეპისკოპოს იაკობს შინაგან საქმეთა მინისტრის მისამართით გაკეთებული განცხადების გამო საპატრიარქოში პრობლემებიც შეექმნა. "იმედის კვირას" წყარო უყვება, რომ ქორეპისკოპოსს ამ თემაზე საუბარი აუკრძალეს. 

ქორეპისკოპოსს იაკობის გარდა მეორე გამოკვეთილი ფიგურა, ვისაც “მღვდელმთავარ პოლიტიკოსად” მოიხსენიებენ პეტრე ცაავაა. განსაკუთრებული  აქტიურობით ის წინასაარჩევნო პერიოდში გამოირჩეოდა. მეტიც, იყო ჩართული  საარჩევნო აგიტაციაში,  ამბიონს პოლიტიკური ქადაგებისთვის იყენებდა და მრევლს ეუბნებოდა ვისთვის არ უნდა დაეჭირა მხარი საპრეზიდენტო არჩევნებზე, კენჭისყრის ყუთთან. 

"დაფრანგული ქალბატონი თავისი დაფრანგული აზროვნებით კეთილდღეობას ვერ მოგვიტანს. ღმერთი არ დაუშვებს ამას რომ არასწორი არჩევანი გააკეთოს",-  ამბობდა ის.

ჭყონდიდელმა მიტროპოლიტმა საზოგადოებას თავი სწორედ დეკანოზის საქმეზე გაკეთებული განცხადებებით დაამახსოვრა. ერთ-ერთი ბოლო  ყველაზე ხმაურიანი აღმოჩნდა. ის სწორედ პატიმროში მყოფ დეკანოზს, გიორგი მამალაძეს და მის საქმეზე პატრიარქის დამოკიდებულებას ეხებოდა. 

ჭყონდიდელი მიტროპოლიტის ბოლო დროინდელ აქტიურობას და საპატრიარქოში მის ხასიათს და ამბიციებს უკავშირებენ. 

საპატრიარქოს პოზიციასთან არ ყოფილა შეთანხმებული უკრაინის ეკლესიის ავტოკეფალიის საკითხზე ზოგიერთი მღვდელმსახურის განცხადებაც. სინოდის გვერდის ავლით, უკრაინისთვის დამოუკიდებლობის დეკლარაციის იგივე ტომოსის მიღებას რამდენიმე მღვდელმთავარმა მხარი დაუჭირა და მილოცვის ტექსტიც გაავრცელა. მათ შორის იყვნენ ფოთის და ხობის მიტროპოლიტი გრიგოლი, ჩრდილოეთ ამერიკის ეპისკოპოსი საბა. წილკნის და დუშეტის მთავარეპისკოპოსი ზოსიმე, შემოქმედელი მიტროპოლიტი იოსები, ჭყონდიდის მიტროპოლიტი პეტრე, ბრიტანეთის და ირლანდიის მთავარეპისკოპოსი ზენონი და ცურტაველი მიტროპოლიტი ვახტანგი. ამ სასულიერო პირებმა დედაეკლესიას შორსმჭვრეტელობა დაუწუნეს და რელიგიური მნიშვნელობის მოვლენის დროულად გააზრება ურჩიეს. 

თითქმის ორი კვირიანი დუმილი საპატრიარქოს პრესცენტრის ხელმძღვანელმა დაარღვია და თქვა რომ ქართულმა ეკლესიამ არც აღიარება უნდა იჩქაროს და არც სხვა ეკლესიებს დაასწროს პოზიციის გამოხატვა. ქართული ეკლესიის დუმილს, ამბობენ, რომ ახლა ოქროს ფასი აქვს. 

ცალკეული მღვდელმთავრების სხვადასხვა პოზიციის მიუხედავად, გადაწყვეტილება მთლიანად წმინდა სინოდმა და პატრიარქმა უნდა მიიღონ. ერთერთი ვერსიით, შესაძლოა უკრაინის ავტოკეფალიის საკითხი ქართულმა მართლმადიდებლურმა ეკლესიამ კენჭისყრაზე არც დააყენოს და ამით ერთგვარი ნეიტრალიტეტი შეინარჩუნოს.