კახა ბექაურმა განმარტა როგორ შეიძლება დარეგულირდეს მობილური ქსელების ტარიფები

ძვირდება თუ არა საქართველოში სატელეკომუნიკაციო ტარიფები, ამასთან დაკავშირებით პასუხი "იმედი LIVE"-ის ეთერში კომუნიკაციების ეროვნული კომისიის თავმჯდომარემ, კახა ბექაურმა ისაუბრა.

ბექაურის განცხადებით, მსოფლიოში ფასის შემცირების ტენდენცია გარკვეულ სერვისებს შეეხებათ, მისი თქმით, მცირდება ხმოვანი მომსახურებების ტარიფები, იმიტომ რომ ხმოვანი მომსახურებაც უკვე ინტერნეტში გადადის.

"Watsapp, Viber უკვე მობილური კომუნიკაციების თანმდევი სერვისები გახდა, შესაბამისად GSM-ის ხმოვანი მომსახურების მოცულობა მცირდება და მცირდება ფასებიც. ამიტომ მსოფლიოში დიდი გამოწვევების წინაშე არიან მობილური კომპანიები, რომ შემოსავლები არ დაკარგონ, ამის გამო ისინი ყოველდღიურად ფიქრობენ თუ რა პროდუქტები შექმნან", - განაცხადა კახა ბექაურმა.

რაც შეეხება საქართველოში ტარიფების გაძვირებას. კახა ბექაურმა კიდევ ერთხელ თქვა, რომ მოცემული ბაზრიდან გამომდინარე ტარიფების გაძვირების წინაპირობა არ არსებობდა. "ორივე კომპანიამ არასწორ დროს და არასწორი გადაწყვეტილება დააანონსა. კარგია, რომ ერთმა კომპანიამ ("სილქნეტმა") შეცვალა ეს გადაწყვეტილება და იმედია მეორეც ("მაგთი") შეცვლის", - განაცხადა კახა ბექაურმა. 

კომუნიკაციების ეროვნული კომისიის თავმჯდომარის კახა ბექაურის განცხადებით, კომპანიებს საცალო ტარიფებში ცვლილების შესახებ კომისიის ინფორმირების ვალდებულება აქვთ და ამის შესახებ ინფორმაცია კომისიას ცვლილებამდე ერთი თვით ადრე უნდა მიეწოდოს. ეს მოთხოვნა, ბექაურის თქმით, კომპანია "მაგთიმ" დააკმაყოფილა, "ჯეოსელს" კი ამისთვის ჯერ ვადა ჰქონდა. ბექაური განმარტავს, რომ კომპანიებს მხოლოდ გაფრთხილების ვალდებულება აქვთ და მათ ტარიფების ცვლილებებზე კომისიასთან შეთანხმების ვალდებულება არ აქვთ.

რაც შეეხება ტარიფების ზრდას, კახა ბექაური განმარტავს, რომ კომუნიკაციების ეროვნულ კომისიას საცალო ბაზარზე ტარიფების დარეგულირების შესაძლებლობა აქვს.

"ჩვენ კანონი გვაძლევს საშუალებას, რომ საცალო ბაზარი დავარეგულიროთ, მათ შორის დავადოთ ზღვრულ ტარიფებზე ვალდებულება. თუ კომისია მივა დასკვნამდე, რომ ეს ორი დიდი ძალის მქონე ოპერატორები ("სილქნეტი" და "მაგთი") ბაზარზე ფასების გაძვირებით თავის ძალაუფლებას ბოროტად იყენებენ, კომისიას უფლება აქვს საცალო ზღვრული ტარიფები დააწესოს", - განაცხადა კახა ბექაურმა.

ბექაურის განმარტებით, კომპანიების კომისიის მიერ დაწესებული ზღვრული ტარიფის შესახებ გადაწყვეტილების გასაჩივრების უფლება სასამართლოში აქვთ, თუმცა კახა ბექაური ფიქრობს, რომ საქმე აქამდე არ მივა, რადგან კომისია დაუსაბუთებელ გადაწყვეტილებას არ მიიღებს.

"თუ კომისია მივიდა ზღვრული ტარიფის დადგენამდე, ამ გადაწყვეტილების გასაჩივრების უფლება კომპანიებს სასამართლოში აქვთ. მე ვფიქრობ, რომ კომისია დაუსაბუთებელ გადაწყვეტილებას არ მიიღებს, ძალიან მცირე ნაწილი გვაქვს საქმეების და მე არ მახსენდება ბოლოს როდის წავაგეთ სასამართლო პროცესი. იმიტომ, რომ კომისიის ყველა ასეთი გადაწყვეტილება ფუნდამენტური კვლევისა და ანალიზის საფუძველზე მიიღება. დეტალურად ხდება საკითხების შესწავლა როგორც აპარატის, ასევე კომისიის ხუთივე წევრის მხრიდან", -განაცხადა კახა ბექაურმა.