NDI-ის პოლიტიკური კვლევის შედეგები. მთავარი

"ეროვნულ-დემოკრატიულმა ინსტიტუტმა" (NDI) საზოგადოებრივი აზრის კვლევის შედეგები წარადგინა. კვლევის მიხედვით, გამოკითხულთა 46% ფიქრობს, რომ საქართველოში დემოკრატია არ არის.

გამოკითხულთა 43% ამბობს, რომ ქვეყანაში დემოკრატია არის, 11%-მა კი "არ იცის". გამოკითხულთა 59% აცხადებს, რომ მისთვის "ძალიან მნიშვნელოვანია" დემოკრატიულ ქვეყანაში ცხოვრება, 33%-ისთვის კი "მნიშვნელოვანია". 

კითხვაზე - "რამდენად გავრცელებულია საქართველოში კორუფცია?" - გამოკითხულთა 21% ამბობს, რომ "საერთოდ არ არის გავრცელებული", 30% კი ამბობს, რომ "ძალიან გავრცელებულია", 15%-მა არ იცის.

გამოკითხულთა 40% ამბობს, რომ კორუფცია "მეტ-ნაკლებად" გავრცელებულია სამინისტროებში, ასევე მეტნაკლებად გავრცელებულია ადგილობრივ თვიმმართველობებში 39%-ისთვის, სასამართლოში 35%-ისთვის, პოლიტიკურ პარტიებში - 34%-ისთვის. ასევე 34% ამბობს, რომ კორუფცია "მეტ-ნაკლებად" გავრცელებულია პროკურატურაში; 32% ამბობს, რომ - პარლამენტში; 36% ამბობს, რომ - საჯარო დაწესებულებებში; 32% კი მიიჩნევს, რომ კორუფცია გავრცელებულია პოლიციაში.

ამასთან, გამოკითხულებს ჰკითხეს, თუ "რას გულისხმობს ეს კორუფცია", რაზეც გამოკითხულთა უმეტესობა ნეპოტიზმს ასახელებს.

კვლევის თანახმად, გამოკითხულთა 53% დასავლური სტილის დემოკრატიულ რესპუბლიკას, 10% ყოფილი საბჭოთა კავშირის სისტემას, 10% კი, ძლიერ ავტორიტარულ სისტემას უჭერს მხარს.

ამასთან, გამოკითხულთა 2% მონარქიის ან ავტოკრატიის მომხრეა, სადაც მმართველობა თაობიდან თაობას გადაეცემა.

რაც შეეხება მთავრობისა და პარლამენტის საქმიანობის შეფასებას, კვლევის თანახმად, 41 % მთავრობის საქმიანობას კარგად აფასებს. გამოკითხულთა 55% არ ეთანხმება მოსაზრებას, რომ პარლამენტმა წინ წამოწია მნიშვნელოვანი საკითხები, რომლებსაც სარგებელი მოაქვს ქვეყნისთვის.

კვლევის მონაწილეებს საპრეზიდენტო არჩევნების შეფასებაც სთხოვეს. კვლევის თანახმად, გამოკითხულთა უმეტესობა ფიქრობს, რომ საპრეზიდენტო არჩევნების პირველ და მეორე ტურში ხმების დათვლა სწორად მოხდა.

რაც შეეხება პოლიტიკური პარტიების რეიტინგს, კითხვაზე "რომელი პარტია დგას თქვენს შეხედულებებთან ყველაზე ახლოს?" გამოკითხულთა 36% ამბობს, რომ "არცერთი პარტია"; პირველ არჩევნად "ქართულ ოცნებას" 27%, ხოლო "ნაციონალურ მოძრაობას" 12%. პასუხზე უარი თქვა 9%-მა. 

"ეროვნულ-დემოკრატიულმა ინსტიტუტმა" (NDI) კვლევის საველე სამუშაო, საქართველოს მასშტაბით, 6-20 დეკემბრის პერიოდში ჩაატარა და პირისპირ ინტერვიუს სახით, წარმომადგენლობითი შერჩევის საფუძველზე, 2 205 ადამიანი გამოკითხა. ცდომილების ზღვარი 2.1%-ია. 

NDI საქართველოს ოფისი 2010 წლიდან ახორციელებს საზოგადოებრივი აზრის კვლევის პროგრამას. ამ კომპონენტის მთავარი მიზანია საზოგადოებრივი აზრის კვლევების ჩატარებისა და გაზიარების გზით, მოქალაქეების პრიორიტეტების შესახებ ინფორმაციის ხელმისაწვდომობისა და ხარისხის გაზრდა.