მესამე სექტორი ცილისწამებაზე ახალი რეგულაციის შემოღებას არ ემხრობა

პრეზიდენტის ადმინისტრაციაში გამართული შეხვედრის დასრულების შემდეგ არასამთავრობო სექტორის წარმომადგენლები ამბობენ, რომ ცილისწამებაზე ახალი კანონის მიღების აუცილებლობას ვერ ხედავენ. ვერ ხედავენ ამ ინიციატივის გარშემო დისკუსიის ფორმატის შექმნის აზრსაც.

როგორც არასამთავრობო ორგანიზაციების იურისტები აცხადებენ, ქვეყანაში გამოხატვის თავისუფლების შესახებ საუკეთესო კანონია და ის არ უნდა შეიცვალოს. თუ მაინც გადაწყდა ახალი რეგულაციების მიღება, მესამე სექტორი პროცესს გაემიჯნება.

სულხან სალაძის თქმით, თვითონ პრეზიდენტი სალომე ზურაბიშვილი შეხვედრას არ დასწრებია და არასამთავრობო სექტორთან მისასალმებელი სიტყვის წარმოთქმის შემდეგ დარბაზი დატოვა. ამასთან, საია-ს თავმჯდომარემ აღნიშნა, რომ შეხვედრაზე ცილისწამების გამო სისხლის სამართლის პასუხისმგებლობის დაკისრების საკითხი გამოირიცხა.

“დღევანდელ შეხვედრაზე საუბარი იყო ლეღვის ნახარშის თემიდან დაწყებული, ლუგარის ლაბორატორიით დასრულებული. იმდენად დიდი დიაპაზონი და იმდენად ბევრი თემა შეიძლება იყრიდეს თავს ამ ორ თემას შორის, რომ პრაქტიკულად, შეუძლებელია, დისკუსია გვქონდეს იმაზე, თუ რა ტიპის ცვლილებები გვჭირდება. ვერ მივიღე მთავარ შეკითხვაზე პასუხი, თუ რა მიზანს ემსახურება ამ ტიპის შეხვედრა. საუბარი იყო საგარეო საფრთხეებზეც, დეზინფორმაციაზე, გამოხატვის თავისუფლებაზე... ამ ყველაფრის ერთ კონტექსტში განხილვა და ამ მასშტაბისა და მოცულობის შეხვედრაზე წინასწარ მომზადების გარეშე ღია მსჯელობა ისე, რომ მომწვევი მხარე პოზიციას არ აფიქსირებდეს, ვფიქრობ, არაეფექტურია. თუ გამოხატვის თავისუფლების ნაწილზე იქნება შეხვედრები, თავისუფლად შემიძლია ვთქვა, რომ საია მონაწილეობას ვერ მიიღებს. რაც შეეხება ისეთ საკითხებს, როგორიც არის გარე საფრთხეები, სხვა პრობლემები, რომელიც შეიძლება, არაკეთილმოსურნე სახელმწიფოებიდან მომდინარეობდეს, მიმაჩნია, რომ ეს თემები სტრატეგიულ განხილვას საჭიროებს და არა მოუმზადებლად მსჯელობას”, - განაცხადა სულხან სალაძემ.

„საერთაშორისო გამჭვირვალობა - საქართველოს" აღმასრულებელი დირექტორის, ეკა გიგაურის განცხადებით, ცილისწამებასთან დაკავშირებით დამატებითი რეგულაციების შემოღება საჭირო არ არის. 

"მესმის, რომ ქალბატონ სალომეს აქვს პერსონალური დამოკიდებულება ამ საკითხთან დაკავშირებით და ცხადია, რომ საჯარო პირს უხდება დეზინფორმაციასთან ბრძოლა, მეც ვარ ერთ-ერთი მაგალითი და ზუსტად ვიცი, ის რას გრძნობს, მაგრამ მეორე მხრივ, მნიშვნელოვანია, რომ გამოხატვის თავისუფლება წინ დავაყენოთ, რადგანაც ეს არის ის მიღწევა, რომელიც ჩვენ ამ ქვეყანაში გვაქვს. ამიტომ დღევანდელი ჩვენი საკანონმდებლო სისტემითაც და რეგულაციებითაც შეგვიძლია და გვაქვს ბერკეტები დავამტკიცოთ, სად ვართ მართლები. მივიდეთ სასამართლოში, მაგრამ თუკი სასამართლო არ იქნება დამოუკიდებელი, მიკერძოებულად და ამორჩეულად მიიღებს გადაწყვეტილებებს, ცხადია, ამ ყველაფრის გაკეთება შეუძლებელი იქნება. ჩემი დავა იყო ამის კარგი მაგალითი. თუკი ადამიანები სხვა შემთხვევაში არ იყვნენ საჯარო პირები და კრიტიკულები ხელისუფლების მიმართ, ისინი ახერხებდნენ სასამართლოს წესით ამ სიმართლის დამტკიცებას და მე ვერ ვახერხებდი იმიტომ, რომ ვიყავი დაპირისპირებული ქართულ ოცნებასთან. ამიტომ სასამართლო სისტემა თუ დამოუკიდებელი იქნება, არანაირი დამატებითი მექანიზმების შემოღება ამ ქვეყანაში საჭირო არ იქნება",- განაცხადა გიგაურმა.

სიტყვის თავისუფლების დაცვის აუცილებლობაზე პრეზიდენტის ადმინისტრაციაშიც საუბრობენ, თუმცა ამბობენ, რომ პარალელურად ქვეყანაში დაცული უნდა იყოს ადამიანის ღირსება.

11 იანვარს გამართულ პრესკონფერენციაზე სალომე ზურაბიშვილმა განაცხადა, რომ პრეზიდენტის ადმინისტრაცია ცილისწამებასთან დაკავშირებულ კანონზე დისკუსიისთვის მზადაა. პარლამენტის თავმჯდომარე პრეზიდენტს დაეთანხმა.

13 იანვარს კი მესამე სექტორმა ცილისწამების შესახებ კობახიძისა და ზურაბიშვილის განცხადებებზე განმარტებები მოითხოვა.