როგორ აფასებს ილიას უნივერსიტეტის რექტორი მიმდინარე პროცესებს და რაში ხედავს გამოსავალს

რა ხდება ილიას სახელმწიფო უნივერსიტეტში. ეროვნული ბანკის ყოფილმა პრეზიდენტმა გიორგი ქადაგიძემ, რომელიც ბოლო დროს ილიაუნის ბიზნესის სკოლის ხელმძღვანელი იყო, რეორგანიზაციისა და სკოლის გაუქმების შესახებ ინფორმაცია 31 იანვარს გაავრცელა. 

პროცესები აკადემიურ საბჭოს ფარგლებს გასცდა და პოლიტიკური ელფერი შეიძინა. პროფესურის ნაწილს ამას რუსთავის 2-ის გენერალური დირექტორის ბოლოდროინდელი აქტივობა აფიქრებინებს. ამ საკითხებთან დაკავშირებით შეკითხვებს "იმედი LIVE"-ს ეთერში ილიას უნივერსიტეტის რექტორმა გიგა ზედანიამ უპასუხა.

გიგა ზედანიას განცხადებით, რომელიც 5 წელია უკვე უნივერსიტეტს ხელმძღვანელობს, ასეთ რეაქციას უნივერსიტეტის ხელმძღვანელობა არ ელოდა. მისი თქმით, მათ ესმით, რომ სტუდენტებს გარკვეული უკმაყოფილება აქვთ ცვლილებებთან დაკავშირებით, თუმცა გასაკვირი იყო ამ საკითხზე გიორგი ქადაგიძის გამოხმაურება:

"იმიტომ, რომ პროცესის განმავლობაში ის მისივე სურვილით ჩართული იყო, შემდეგ კი ჩვენი აზრით არასწორი ინტერპრეტაცია მისცა საკითხს. მაგრამ მას შემდეგ, რაც ამ თემას პრაიმტაიმში დაეთმო დრო, ცხადია სრულიად სხვა მასშტაბი შეიძინა", - თქვა გიგა ზედანიამ.

უნივერსიტეტის რექტორის თქმით, მისი აზრით, ადგილი ჰქონდა მოლოდინების აცდენას, ერთი მხრივ უნივერსიტეტის მმართველობითი რგოლების მხრიდან, მეორე მხრივ კი გიორგი ქადაგიძის მხრიდან: "სავარაუდოდ სხვადასხვა მოლოდინებს ჰქონდა ადგილი.. ყოველ შემთხვევაში გარკვეული დაძაბულობის და კომუნიკაციის ნაკლებობის პროცესი არსებობდა და ამან გამოხატულება ჰპოვა იმ პროცესშიც, რომელიც წინ უძღოდა რეორგანიზაციას და სტრუქტურულ ცვლილებებს", - თქვა გიგა ზედანიამ.

"მაგალითად ის (გიორგი ქადაგიძე) ამბობდა, რომ "მე არ მოვალ ამ შეხვედრაზე, იმიტომ რომ არ ვეთანხმები ვთქვათ ჯგუფის შემადგენლობას", - განმარტა ზედანიამ. 

ზედანიას თქმით, კომუნიკაციის ნაკლებობა ("მისკომუნიკაცია"), მასთან არ დაწყებულა, არამედ სხვა რგოლებთან დაიწყო და შემდეგ გაგრძელდა აკადემიურ წარმომადგენლობით საბჭოებთან. 

გიგა ზედანიას განმარტებით, უნივერსიტეტში მიმდინარე პროცესს საფუძვლად შინაარსობრივი გადაწყვეტილებები უდევს:

"ჩვენ ძალიან გვინდა, რომ ბიზნესის სკოლა კავშირში იყოს ტექნოლოგიებთან იმიტომ, რომ ძალიან კარგად გვესმის - თანამედროვე ბიზნესი ვითარდება ახალი ცოდნის და ახალი გამოგონებების ხარჯზე... პლიუს ამას ვაკეთებდით შიდა გამოწვევების საფუძველზე - ჩვენ გვაქვს ინფრასტრუქტურა, რომელიც ცხადია უსასრულო არ არის და შეზღუდულია, და ჩვენ მისი ოპტიმალურად გამოყენება გვინდა", - განმარტა ზედანიამ. 

გიგა ზედანიას თქმით, გიორგი ქადაგიძეს დღესაც აქვს შანსი, რომ გახდეს ფაკულტეტის დეკანი. 

"ამ არჩევნებში მე არ ვმონაწილეობ, მონაწილეობას იღებს ფაკულტეტის პროფესურა. ახლაც გამოცხადებულია კონკურსი და მას შეუძლია შეიტანოს განაცხადი და თუ მას ამ ფაკულტეტის პროფესურა აირჩევს, მე ამაზე არანაირი გავლენა არ მაქვს", - თქვა ილიას უნივერსიტეტის რექტორმა.

იმისთვის, რომ უნივერსიტეტში ნორმალური სასწავლო გარემო განახლდეს და კრიზისი დაიძლიოს გიგა ზედანია შემდეგ გზას ხედავს:

"საგამოცდო პროცესი შეუფერხებლად მიმდინარეობს. კრიზისის ნიშნებს მე დავინახავდი არა იმიტომ, რომ ბატონი გიორგი გარკვეული გადაწყვეტილებებით უკმაყოფილოა, არამედ იმიტომ რომ სტუდენტების რაღაც რაოდენობა არსებობს, რომელიც უკმაყოფილოა. ჩვენთვის ეს არის ყველაზე დიდი და მნიშვნელოვანი გამოწვევა და სწორედ ამ მიმართულებით ვაკეთებთ ჩვენ ყველაზე მეტს. ვცდილობთ, რომ რაც შეიძლება ბევრი ვისაუბროთ სტუდენტებთან. სტუდენტისთვის ვერ იქნება ყველაზე მნიშვნელოვანი თუ რა ერქმევა ფაკულტეტს. სტუდენტს ამ ფაკულტეტით რაღაცის მიღწევა უნდა. ჩვენ ამიტომაც ყველასთან ვსაუბრობთ, სწორედ იმიტომ, რომ ამ შედეგებამდე მივიდეთ, გაგვაგებინეთ რით ხართ უკმაყოფილო და ჩვენ შევეცდებით, რომ არსებული ფორმალური სტრუქტურები მოვარგოთ ამ შედეგის მიღწევის საქმეს. ამაზე ვმუშაობთ", - განაცხადა გიგა ზედანიამ და დასძინა, რომ სტუდენტებთან ამაზე საუბარი დაიწყო და გრძელდება. 

"მე ძალიან ოპტიმისტურად ვუყურებ ამ პროცესის დასასრულს", - თქვა ილიას სახელმწიფო უნივერსიტეტის რექტორმა გიგა ზედანიამ.