გიგა ზედანია სტუდენტების ულტიმატუმზე: ეს არ არის ის ფორმა, რაზეც შეიძლება ვისაუბროთ

ილიას სახელმწიფო უნივერსიტეტის სტუდენტების ნაწილმა უწყვეტი საპროტესტო აქცია დაიწყო. მათ უნივერსიტეტის რექტორს ვადა 19:00 საათამდე მისცეს. ისინი ითხოვენ, რომ ბიზნესსკოლას დაუბრუნდეს პირვანდელი სახელი და თანამდებობაზე დაბრუნდეს გიორგი ქადაგიძე. ინფორმაციას სააგენტო "ინტერპრესნიუსი" ავრცელებს.

ილიაუნის რექტორის, გიგა ზედანიას განცხადებით, ადმინისტრაციის მთავარი ამოცანა სტუდენტების მოთხოვნისა და სურვილის შეძლებისდაგვარად გათვალისწინებაა. ზედანია ამბობს, რომ მას უკვე დაწყებული აქვს მუშაობა, რათა შეიკრიბოს კოლეგიალური საბჭოები, რომელთაც უნდა განიხილონ სტუდენტთა ნაწილის მოთხოვნა, თუმცა არ იცის, რამდენად მოხერხდება დღეს მათი შეკრება.

"ცხადია, რომ ულტიმატუმი და ვადაზე საუბარი ვერ იქნება განხილული როგორც სერიოზული საუბარი, თუმცა, რაც შეეხება სერიოზულ საუბარს, ჩვენ აუცილებლად ვაპირებთ პროცესის გაგრძელებას. მათ მოთხოვნებზე წარმომადგენლობითი თუ აკადემიური წრეების წარმომადგენლებთან ერთად ვიმსჯელებთ. ახლა ხდება ორგანიზება, რათა შეიკრიბოს კოლეგიალური საბჭოები, თუმცა არ ვიცი, როგორ მოხდება შეკრება.

მოთხოვნა და ულტიმატუმი არ არის ის ფორმა, რაზეც ჩვენ შეიძლება ვისაუბროთ“, - განაცხადა გიგა ზედანიამ.

სტუდენტების ინფორმაციით, გიგა ზედანია მათ დაჰპირდა, რომ დღეს შეიკრიბება აკადემიური საბჭო, რომელიც მიმდინარე პროცესებთან დაკავშირებით იმსჯელებს. სტუდენტები აცხადებენ, რომ თუკი მათი მოთხოვნები არ დაკმაყოფილდება, ზედანიას გადადგომას მოითხოვენ.   

ეროვნული ბანკის ყოფილმა პრეზიდენტმა გიორგი ქადაგიძემ, რომელიც ბოლო დრომდე ილიაუნის ბიზნესის სკოლის ხელმძღვანელი იყო, რეორგანიზაციისა და სკოლის გაუქმების შესახებ ინფორმაცია 31 იანვარს გაავრცელა. 

ილიაუნიში მიმდინარე პროცესებზე „იმედის“ ეთერში ვრცლად უნივერსიტეტის რექტორმა გიგა ზედანიამ ისაუბრა.