ნიკოლოზ ანთიძემ დეპუტატებს 2018 წლის მუშაობის ანგარიში წარუდგინა

ბორჯომში განათლების, მეცნიერებისა და კულტურის კომიტეტის გასვლით სხდომაზე დეპუტატებმა კულტურული მემკვიდრეობის დაცვის ეროვნული სააგენტოს 2018 წლის შესრულებული სამუშაოს ანგარიში მოისმინეს. ინფორმაციას პარლამენტის პრესსამსახური ავრცელებს.

ანგარიში, 2019 წლის სამოქმედო გეგმასთან და საკანონმდებლო კუთხით არსებულ გამოწვევებთან ერთად სააგენტოს დირექტორმა, ნიკოლოზ ანთიძემ წარმოადგინა. ანგარიშის თანახმად ირკვევა, რომ 2018 წელს სააგენტო 40 ძეგლის რეაბილიტაციის პროექტზე მუშაობდა, დღეისთვის კი დასრულებულია უკვე 25 პროექტი. 

"შემუშავებულია ენგურის ტურისტული ცენტრის პროექტი ესტონური კომპანიის მიერ. ჩატარდა მნიშვნელოვანი სამუშაოები ობიექტების ინვენტარიზაციისა და მათთვის ძეგლის სტატუსის განსაზღვრის თვალსაზრისით“, - განაცხადა ნიკოლოზ ანთიძემ.

ანთიძემ ასევე ილაპარაკა 2019 წელს დაგეგმილი კულტურული მემკვიდრეობის ძეგლების რეაბილიტაციის, კონსერვაციის, კვლევისა და პროექტირების შესახებ.

ანგარიში შეაფასა კომიტეტის თავმჯდომარემ მარიამ ჯაშმა. მისი თქმით, დასრულების სტადიაშია მუცოს სარეაბილიტაციო სამუშაოები, გრძელდება ნოქალაქევის კომპლექსის, აწყურის ღვთისმშობლის ტაძრისა და აწყურის ციხის რეაბილიტაცია.

„ერთ-ერთი უდიდესი მიღწევაა მცხეთისა და გელათის ამოღება იუნესკოს საფრთხის ქვეშ მყოფი მსოფლიო მემკვიდრეობის სიიდან. ჩვენ გადავარჩინეთ მცხეთა და გელათი“, - განაცხადა მარიამ ჯაშმა.

მისი თქმით, 2018 წელს კულტურული მემკვიდრეობის ძეგლების მოვლისა და რესტავრაციის საქმესთან დაკავშირებით 8000-ზე მეტი ადამიანი დასაქმდა. მისივე ინფორმაციით, სააგენტოსა და და საქართველოს ისტორიულ ძეგლთა დაცვისა და გადარჩენის ფონდის თანამშრომლობის შედეგად, ასევე სამინისტროსა და ფონდი „ქართუს“ ხელშწყობით 122 ძეგლს რეაბილიტაცია ჩაუტარდა.

„ბოლო 5 წლის განმავლობაში მნიშვნელოვნად იზრდება მუზეუმებსა და მუზეუმ-ნაკრძალებში ვიზიტორთა რაოდენობა, რის შედეგადაც 5-ჯერ გაიზარდა შემოსული ფინანსური რესურსების რაოდენობა“, - განაცხადა კომიტეტის თავმჯდომარემ.

კომიტეტის სხდომა ბორჯომში 13 თებერვალს გაიხსნა და 15 თებერვლამდე გაგრძელდება. კომიტეტის წევრები განათლების, მეცნიერების, კულტურისა და სპორტის სამინისტროს ხელმძღვანელ პირებთან ერთად 2019 წლის სამოქმედო გეგმას დაამტკიცებენ. სხდომის დღის წესრიგშია, აგრეთვე, განათლების, მეცნიერების, კულტურისა და სპორტის სამინისტროსა და მის შემადგენლობაში შემავალი საჯარო სამართლის იურიდიული პირების 2019 წლის სამოქმედო გეგმა და პრიორიტეტული მიმართულებები.