ტატუნაშვილის ხსოვნას პატივი მუხათგვერდის სასაფლაოზე მიაგეს

საქართველოს ეროვნული გმირის არჩილ ტატუნაშვილის გარდაცვალებიდან ერთი წელი გავიდა. საოკუპაციო რეჟიმის მსხვერპლის ხსოვნას დღეს მუხათგვერდის სასაფლაოზე მიაგეს პატივი. იქ იყვნენ ტატუნაშვილის ოჯახის წევრები, პრემიერმინისტრი და მინისტრთა კაბინეტის სხვა წევრები. 

„დღეს ერთი წელი გავიდა არჩილ ტატუნაშვილის სასტიკი მკვლელობიდან. ერთი წლის წინ, საოკუპაციო რეჟიმმა ჩვენი კიდევ ერთი მოქალაქე იმსხვერპლა. სასტიკად აწამეს, მაგრამ სულით ვერ გატეხეს. არჩილ ტატუნაშვილი არის ქართველი გმირი, ისევე, როგორც გმირები არიან მისი მშობლები, რომ ასეთი ვაჟკაცი აღუზარდეს საქართველოს. ჩვენ სწორედ ასეთი მძიმე დანაშაულების გამო შევქმენით „ოთხოზორია-ტატუნაშვილის სია“ და ამ სიაში შეყვანილ ბრალდებულ პირებს საერთაშორისო სამართლით უნდა მოეთხოვოთ პასუხი. ეს სია აუცილებლად გაფართოვდება, ვინაიდან გამოძიება ჯერ კიდევ მიმდინარეობს. ჩვენ ყველა პარტნიორს ვთხოვთ, გაითვალისწინოს ეს სია და ვფიქრობ, 2019 წელი ამ თვალსაზრისით ძალიან მნიშვნელოვანი იქნება. ჩვენ ყველა მექანიზმს ვიყენებთ, რომ ეს ინფორმაცია მივაწოდოთ საერთაშორისო საზოგადოებას, იქნება ეს გაერო, ეუთო, ევროკავშირი თუ სხვა საერთაშორისო პლატფორმა. დარწმუნებული ვარ, ქართული სახელმწიფო აუცილებლად დააყენებს მართლმსაჯულებას ამ სასტიკ დანაშაულზე. ჩვენ უნდა შევძლოთ ყველაფერი, რომ მომავალში ასეთი ტრაგედიები გამოვრიცხოთ. ეს იყო ტკივილი, რომელმაც მთელი საქართველო გააერთიანა. ქართული სახელმწიფო დგას არჩილისნაირ გმირებზე”, - განაცხადა მამუკა ბახტაძემ.

ქართული სახელმწიფო ყველაფერს გააკეთებს იმისთვის, რომ გმირები არ დაივიწყოს და პატივი მიაგოს მათ, - ასე გამოეხმაურა ტატუნაშვილის გარდაცვალების წლისთავს საპარლამენტო უმრავლესობის წევრი მამუკა მდინარაძე. ოპოზიცია კი აცხადებს, რომ ტატუნაშვილის საქმესთან  დაკავშირებით ხელისუფლება საერთაშორისო ზეწოლის მექანიზმებს საკმარისად ვერ იყენებს.

საოკუპაციო რეჟიმის მორიგი მსხვერპლი გასული წლის 22 თებერვალს ახალგორიდან გაიტაცეს, 23 თებერვალს გამთენიისას კი, გავრცელდა ცნობა მისი გარდაცვალების შესახებ.  

35 წლის ნაწამები ჯარისკაცის ცხედარი ქართულ მხარეს მხოლოდ 26 დღის  შემდეგ გადმოსცეს. ტატუნაშვილი მუხათგვერდის ძმათა სასაფლაოზე სამხედრო პატივით დაკრძალეს. ე.წ. სამხრეთ ოსეთის დეფაქტო ხელისუფლებამ სიკვდილის მიზეზად გულის უკმარისობა დაასახელა. ექსპერტიზის თანახმად კი, ცხედარს 100-მდე დაზიანება ჰქონდა.

არჩილ ტატუნაშვილის საქმეზე ცენტრ „ემპათიის“ მიერ მომზადებული სარჩელი, რომელშიც  წერია, რომ 35 წლის ტატუნაშვილი წამებითაა მოკლული, სტრასბურგის სასამართლომ უკვე დაარეგისტრირა.