ეკა ბესელია ნაციონალებთან თანამშრომლობას გამორიცხავს

პარლამენტის დეპუტატმა ეკა ბესელიამ საგანგებო ბრიფინგზე განაცხადა, რომ დამოუკიდებელი პოლიტიკური პლატფორმის შექმნას გეგმავს და ნაციონალებთან თანამშრომლობა კატეგორიულად გამორიცხა.

„ნაციონალურ მოძრაობასთან“ და მის ნარჩენებთან არ ვითანამშრომლებ. ყველა ერთია ჩემთვის“, - განაცხადა ეკა ბესელიამ.

ეკა ბესელიამ თქვა, რომ პარტია "ქართული ოცნება" და უმრავლესობა დატოვა. ამას წინ უძღოდა ის ფაქტი, რომ პარლამენტში ეკა ბესელიას და მისი 8 თანამოაზრის კანონპროექტი ჩავარდა. ამის შემდეგ უმრავლესობა ლევან გოგიჩაიშვილმა დატოვა.

115-კაციანი უმრავლესობიდან კიდევ ერთი დეპუტატის გასვლის შემთხვევაში, "ქართული ოცნება" პარლამენტში 3/4-იან საკონსტიტუციო უმრავლესობას დაკარგავს. დეპუტატების ეკა ბესელიასა და ლევან გოგიჩაიშვილის შემდეგ, უმრავლესობიდან გასვლაზე განცხადების გაკეთებისთვის გედევან ფოფხაძე და ბექა ნაცვლიშვილი ემზადებიან.

პარლამენტის პირველმა ვიცე-სპიკერმა თამარ ჩუგოშვილმა განაცხადა, რომ საკონსტიტუციო უმრავლესობის დაკარგვა ტრაგედია არაა.

„საკონსტიტუციო უმრავლესობას მე პირადად სულ არ გამოვეტირები, სულ არ მგონია სწორი და კარგი რამ. რაც შეეხება იმ დაძაბულობას, რომელიც დეკემბრის ბოლოდან განვითარდა, რომლის კულმინაციაც ალბათ, გუშინ იყო სხდომაზე, ვისურვებდი, მოხერხებულიყო პროცესების ისე წარმართვა, რომ ნაკლები დაძაბულობის ფონზე მიგვეღწია შედეგისთვის. ამისთვის ალბათ ორივე მხარის მხრიდან მზაობა არის საჭირო", - განაცხადა ჩუგოშვილმა.

მანამდე პარლამენტის პლენარულ სესიაზე ცხრა დეპუტატის მიერ მომზადებული „საერთო სასამართლოების შესახებ“ კანონპროექტი განიხილეს. „საერთო სასამართლოების შესახებ“ კანონში ცვლილებები რაიონულ და სააპელაციო სასამართლოებში 2024 წლის 31 დეკემბრამდე მოსამართლეთა უვადოდ დანიშვნის შეჩერებას ითვალისწინებდა.

კანონპროექტს ხელს აწერენ დეპუტატები: ეკა ბესელია, ზვიად კვაჭანტირაძე, ალექსანდრე ერქვანია, გედევან ფოფხაძე, კობა ნარჩემაშვილი, ლევან გოგიჩაიშვილი, ლევან კობერიძე, დავით ჭიჭინაძე და ოთარ ჩრდილელი.

პირველი პროექტი, რომელსაც ჩვენ ალბათ, შემდეგ კვირას წარვუდგენთ პარლამენტს და ბიუროს, იქნება უზენაესი სასამართლოს მოსამართლეების შერჩევის კრიტერიუმები და პროცესი, - განაცხადა ეკა ბესელიამ.

„ჩვენ ვართ პარლამენტში, ჩვენ გვაქვს დეპუტატის მანდატები, რაც გვაძლევს საშუალებას ვისაუბროთ ხალხის სახელით, ჩვენ გვექნება შეხვედრები და კონსულტაციები საზოგადების სხვადასხვა ფენასთან და გეტყვით, დაველოდოთ იმ ადამიანებს, რომლებმაც გადაწყვეტილებები უნდა მიიღონ, რომ გარკვეული ფორმა მივცეთ ამ ყველაფერს. ამის შემდეგ ხალხთან, ჩვენს მხარდამჭერებთან მოთათბირებით გეტყვით, როგორი იქნება ჩვენი კონკრეტული ნაბიჯები.

ყველა თვითონ აკეთებს თავის არჩევანს. მე გავაკეთე ჩემი არჩევანი და ამ არჩევანით ფასდება ადამიანის ღირებულებები, ვინც არ უნდა იყოს ეს, პარტიის თავმჯდომარე თუ პარტიის სხვა რომელიმე წევრი. რაც შეეხება შემდეგ ნაბიჯებს რა იქნება, უახლესი ნაბიჯები სამართლებრივი ბრძოლის გზებია. მე პირადად მზად მაქვს რამდენიმე საკანონმდებლო ინიციატივა, რომელსაც ჩემს თანამოაზრეებთან ერთად უახლოეს დღეებში დავარეგისტრირებ და გაგაცნობთ. ეს ეხება უზენაესი სასამართლოს მოსამართლეთა არჩევის წესს. პირველი პროექტი, რომელსაც ჩვენ ალბათ, შემდეგ კვირას წარვუდგენთ პარლამენტს და ბიუროს, იქნება უზენაესი სასამართლოს მოსამართლის შერჩევის კრიტერიუმები და პროცესი და დავიწყებთ მზადებას კონსტიტუციური ცვლილებებისთვის“, - განაცხადა ეკა ბესელიამ.