ჯანეზაშვილი: ამ ვერსიით სისტემის მიღმა მყოფ კვალიფიციურ იურისტებს უზენაესში მოხვედრის შანსი არ აქვთ

უზენაესი სასამართლოს მოსამართლეობის კანდიდატთა კრიტერიუმები იუსტიციის საბჭოში ისევ აზრთა სხვადასხვაობის მიზეზია.

საბჭოს არამოსამართლე წევრს ნაზი ჯანეზაშვილს მიაჩნია, რომ სამუშაო ჯგუფის მიერ ამ საკითხზე მსჯელობა მხოლოდ ფორმალობაა. ჯანეზაშვილის თქმით, არსებული რეალობა სისტემის მიღმა მყოფ კვალიფიციურ იურისტებს უზენაეს სასამართლოში მოხვედრის შესაძლებლობას არ უტოვებს.  

"საბოლოო ვერსიაში როგორ ჩამოყალიბდება, არ ვიცი, მაგრამ ამ ეტაპზე რა ვერსიაც მოგვაწოდეს, ნათქვამია, რომ უზენაესი სასამართლოს მოსამართლეობის კანდიდატურა შეიძლება იყოს მხოლოდ მოქმედი მოსამართლე, ყოფილი მოსამართლე ან იურისტი; ანუ სამეცნიერო წრის წარმომადგენელი, რომელსაც მოსამართლის გამოცდა ჩაბარებული აქვს. ეს მიუღებელია, რადგან სწორედ უზენაესი სასამართლო არის შესაძლებლობა იმისათვის, რომ გამოცდის ჩაბარების გარეშე, მოსამართლის გამოცდილების გარეშე და მოქმედი მოსამართლის სტატუსის გარეშე შეიძლება დაინიშნოს მაღალკვალიფიციური იურისტი. ვფიქრობ, პარლამენტმა უნდა შეცვალოს ხედვა და მიდგომა საკითხისადმი",- თქვა ნაზი ჯანეზაშვილმა.

ამ შეფასებას არ ეთანხმებიან იუსტიციის უმაღლესი საბჭოს მოსამართლე წევრები. მათი განცხადებით, მოსამართლის საკვალიფიკაციო გამოცდის ჩაბარების შემდეგ შანსი ყველა იურისტს ეძლევა. 

21 იანვარს უზენაესის მოსამართლეობის სადავო კანდიდატებმა მოსამართლეებად არჩევაზე უარი თქვეს. 24 დეკემბერს იუსტიციის უმაღლესმა საბჭომ უზენაეს სასამართლოში წარსადგენ მოსამართლეთა 10 კანდიდატურა დაასახელა. ამ კანდიდატების დასახელებამ საზოგადოების ვნებათაღელვა გამოიწვია.

მოგვიანებით მოსამართლეებმა კანდიდატურები მოხსნეს და შეიქმნა სამუშაო ჯგუფი უზენაესი სასამართლოს მოსამართლეების კანდიდატების შერჩევის კრიტერიუმების დასადგენად.