თბილისის ვიცემერი: ჰაერის დაბინძურებაზე ომბუდსმენის ანგარიშში უზუსტობებია

თბილისის ვიცემერი ირაკლი ხმალაძე სახალხო დამცველის მიერ ჰაერის დაბინძურების შესახებ ანგარიშში მოყვანილ ფაქტებს არ ეთანხმება და დასძენს, რომ ანგარიშში უზუსტობებია. ვიცემერის თქმით, თბილისის მერიის ერთ-ერთი პრიორიტეტი დედაქალაქში ჰაერის დაბინძურების მაჩვენებლის შემცირებაა და ამასთან დაკავშირებით კანონპროექტიც მზად არის და მის შესახებ მერია საზოგადოებას ინფორმაციას უახლოეს პერიოდში მიაწვდის. 

ირაკლი ხმალაძის განცხადებით, ევრო 6-ის სტანდარტის შესაბამის იმ ავტობუსებს, რომელიც დედაქალაქში გადაადგილდება და უახლოეს მომავალში მათი ახალი ნაკადი შემოვა, მინიმალური გამონაბოლქვი აქვს.

როგორც მან ატმოსფერული ჰაერის დაბინძურების ხარისხთან დაკავშირებით სახალხო დამცველის მიერ წარდგენილი სპეციალური ანგარიშის შეფასებისას განაცხადა, ახალი ავტობუსები ევრო 6 სტანდარტის დიზელს მოიხმარს, რომელიც მუნიციპალიტეტმა უკვე შეისყიდა.

ირაკლი ხმალაძის განცხადებით, მუნიციპალური ტრანსპორტის პარკის განახლება გეგმის მიხედვითა და ევროსტანდარტების შესაბამისად განხორციელდება.

„დედაქალაქში მოძრავი MAN-ის ლურჯი ავტობუსები, რომელიც გაზზე მუშაობს, ევრო 6 ტიპისაა - მის გამონაბოლქვს აქვს მინიმალური დონე და ევროკავშირის სტანდარტებს შეესაბამება. რაც შეეხება ახალ, დიზელზე მომუშავე ავტობუსებს, რომელიც ჩვენ შევიძინეთ, არის ასევე, ევრო 6 ტიპის. ამისთვის ჩვენ ნაყიდი გვაქვს ევრო ტიპის დიზელის მარაგი და ის კონკრეტულად მხოლოდ ამ დიზელს მოიხმარს. ამდენად, ამ მიმართულებით, ჰაერის დაბინძურების პრობლემა არ გვაქვს. რაც შეეხება იმას, თუ რატომ არ გადავედით სრულად ელექტროავტობუსების პარკზე, ამას ძალიან ბევრი ტექნიკური რისკ-ფაქტორი აქვს, რის გამოც, ჯერ მსოფლიოს არცერთი ქალაქი არ არის სრულად ელექტროავტობუსებზე გადასული. ჩვენ მივყვებით იმ განრიგს და გრაფიკს, როგორც ამას აკეთებენ მსოფლიოს განვითარებული ქალაქები და ელექტროავტობუსების დანერგვაც თბილისში ეტაპობრივად მოხდება. მთავარია, რომ ორივე შემთხვევაში, ეს იქნება ამჟამად გაზზე, თუ შემდეგში უკვე დიზელზე მომუშავე ავტობუსები, გამონაბოლქვის დონე მინიმალურია და მსოფლიო სტანდარტებს შეესაბამება“, - განაცხადა ირაკლი ხმალაძემ.

ვიცემერის განმარტებით, ჰაერის დაბინძურების მაჩვენებლის შემცირების მიმართულებით, დედაქალაქის მერიის აქტიურ მუშაობას, მერიის ინიციატივით მომზადებული კანონპროექტიც ადასტურებს, რომელიც საკანონმდებლო ორგანოში განხილვის ეტაპზეა.  

„ჰაერის დაბინძურების შემცირება რომ თბილისის მერიის პრიორიტეტია, ამაზე ჩვენ უკვე ერთი წელია ვსაუბრობთ. მომზადებული გვაქვს კანონპროექტი და კონცეფცია ამ მიმართულებით. ქალაქში ჰაერის დაბინძურების მაჩვენებლის შემცირებისკენ მიმართულ პოლიტიკას ჩვენი ზონალური პარკირების სისტემა, სატრანსპორტო პოლიტიკა, ავტობუსების პარკის ჩანაცვლება და სამშენებლო მიმართულება ემსახურება, რომელიც ჰაერის დაბინძურებაში კონტრიბუციის სახით, ერთ-ერთი ყველაზე მსხვილი კომპონენტია. გვსურს, გადავდგათ გარკვეული ნაბიჯები, რომელიც ახლო პერიოდში გარკვეულ შედეგებს მოგვცემს. ჰაერის დაბინძურების გამომწვევი ორი მსხვილი კომპონენტი დედაქალაქში ტრანსპორტიდან გამონაბოლქვი და სამშენებლო მასალებიდან მიღებული დაბინძურებაა. თბილისის მერია ორივე მიმართულებით, რეგულაციების გამკაცრების თვალსაზრისით, მუშაობას აქტიურად განაგრძობს“, - აღნიშნა თბილისის ვიცემერმა.

დღეს ომბუდსმენმა ჰაერის დაბინძურების შესახებ ანგარიში წარადგინა. მისი განცხადებით, ატმოსფერული ჰაერის დაცვის კუთხით ვითარება მძიმეა, რასაც რამდენიმე გარემოება განაპირობებს, მათ შორის, სამშენებლო პროცესის დროს მყარი ნაწილაკების ჰაერში გაფრქვევა, მოძველებული ავტოპარკი, საწვავის ხარისხზე განხორციელებული არასრულფასოვანი მონიტორინგი და ჰაერის ხარისხის მონიტორინგისთვის სადამკვირვებლო სადგურების სიმცირე.