კობახიძემ საქართველო-პოლონეთის საპარლამენტო ასამბლეის პლენარული სესია გახსნა

საქართველოს პარლამენტის თავმჯდომარის პოლონეთის რესპუბლიკაში ვიზიტის ფარგლებში ირაკლი კობახიძემ საქართველო-პოლონეთის საპარლამენტო ასამბლეის საინაუგურაციო პლენარული სესია გახსნა. ინფორმაციას საქართველოს პარლამენტის პრესსამსახური ავრცელებს. 

ასამბლეის საინაუგურაციო პლენარულ სესიაზე ირაკლი კობახიძე სიტყვით წარსდგა და ქართველ და პოლონელ ხალხს შორის არსებულ ისტორიულ მეგობრობაზე ილაპარაკა. მისი თქმით, მსოფლიოში იშვიათია ორი ერი, რომელთა ბოლო საუკუნეების ისტორიაც ერთმანეთს ძალიან ჰგავს. 

„ნება მომეცით, დღევანდელი მოვლენა საქართველოსა და პოლონეთის ისტორიის ფონზე განვაზოგადო: თავისუფლებისადმი ჭეშმარიტი მისწრაფება იმდენად ძლიერია, რომ მისთვის საუკუნეც კი არაფერს ნიშნავს. მართლაც, წელს სრულდება 100 წელიწადი საქართველოსა და პოლონეთის დამოუკიდებელ სახელმწიფოებს შორის დიპლომატიური ურთიერთობების დაწყებიდან. გასული საუკუნის განმავლობაში ჩვენმა ერებმა ბევრი სირთულე გამოიარეს, მაგრამ დღეს სიამაყით ვხვდებით ჩვენი პარლამენტების საერთო ძალისხმევის ძალიან მნიშვნელოვან შედეგს - საპარლამენტთაშორისო ასამბლეის გახსნას“, - განაცხადა ირაკლი კობახიძემ. 

პარლამენტის თავმჯდომარის განმარტებით, საქართველოს ხელისუფლება საპარლამენტო ასამბლეას, როგორც დასავლეთისკენ კიდევ ერთ დამაკავშირებელ ხიდს ისე განიხილავს.

„თავისუფლება და დემოკრატია არის ჩვენი ისტორიისა და დღევანდელობის, ქართველი და პოლონელი ხალხების მომავლის საფუძველი. ჩვენ უნდა გავუფრთხილდეთ და დავიცვათ ეს მონაპოვარი. დარწმუნებული ვარ, რომ ნებისმიერი სიძნელის მიუხედავად, ჩვენი ხალხების თავისუფლება ხელშეუხებელი იქნება. საქართველოს ხელისუფლება პოლონეთთან ერთობლივ საპარლამენტო ასამბლეას განიხილავს, როგორც კიდევ ერთ ხიდს დასავლეთისაკენ“, - დასძინა ირაკლი კობახიძემ.

სიტყვით გამოსვლისას, ირაკლი კობახიძემ ასამბლეის მომდევნო სხდომის საქართველოში მასპინძლობისთვის მზადყოფნა დაადასტურა.

საქართველო-პოლონეთის საპარლამენტო ასამბლეის შექმნას საფუძველი 2017 წელს, სტრატეგიული თანამშრომლობის შეთანხმების გაფორმებით ჩაეყარა.

საპარლამენტო ასამბლეის წესდებას ირაკლი კობახიძემ და პოლონეთის რესპუბლიკის სეიმის მარშალმა ხელი თბილისში, გასული წლის ნოემბერში მოაწერეს. ასამბლეაში საქართველოს დელეგაციას პარლამენტის თავმჯდომარის მოადგილე გიორგი ვოლსკი ხელმძღვანელობს.

ვიზიტის ფარგლებში ირაკლი კობახიძემ აუდიენცია გამართა პოლონეთის რესპუბლიკის სეიმისა (მარეკ კუხჩინსკი) და რესპუბლიკის სენატის (სტანისლავ კარჩევსკი) მარშალებთანაც. 

მანამდე ირაკლი კობახიძე პოლონეთის პრემიერმინისტრს შეხვდა. 

ქართული პარლამენტარიზმის 100 წლისთავი 2019 წლის 12 მარტს აღინიშნება.