„მასწავლებლის ეროვნული ჯილდო 2019“ იწყება. რა სიახლეები იგეგმება წელს

"მასწავლებლის ეროვნული ჯილდო 2019" იწყება. კონკურსი  წელს მესამედ ტარდება. წლევანდელი კონკურსის მნიშვნელოვანი სიახლე ნომინირებაა. როგორც კოალიციის „განათლება ყველასათვის“ დირექტორმა გიორგი ჭანტურიამ თქვა, შარშანდლისაგან განსხვავებით, წელს მასწავლებლის წარდგენა არა მარტო სკოლებს შეეძლებათ არამედ ფიზიკურ პირებსა და საზოგადოებრივ ჯგუფებსაც. 

"ასევე, 2019 წელს შემოგვაქვს ‘ქრაუდფანდინგის’ ელემენტი და ნებისმიერ დაინტერესებულ პირს საშუალება ექნება მხარი დაუჭიროს პროექტს და გახდეს ჯილდოს დონორი", – განაცხადა კოალიციის დირექტორმა გიორგი ჭანტურიამ.

კონკურსში მონაწილეობის მსურველი მასწავლებლების რეგისტრაცია ვებგვერდზე www.tprize.ge 1 მარტიდან 20 აპრილის ჩათვლით გაგრძელდება. ამის შემდეგ კი, კონკურსანტთა შერჩევის სამ-ეტაპიან პროცესს 18 წევრისგან დაკომპლექტებული ჟიური წარმართავს. ჟიურიში შედიან განათლების სპეციალისტები, მეცნიერები, პედაგოგები და მედიის წარმომადგენლები.

კონკურსის პირველ ეტაპზე აპლიკაციები ტექნიკურად შემოწმდება, მეორე ეტაპისთვის გამოვლინდება კონკურსანტთა ათეული, ხოლო მესამე ეტაპზე, მიმდინარე წლის 5 სექტემბერს, ცნობილი გახდება იმ ხუთი ფინალისტის ვინაობა, რომელთაგან ერთ-ერთი, 5 ოქტომბერს, მასწავლებლის საერთაშორისო დღეს, გახდება ”მასწავლებლის ეროვნული ჯილდოს” მფლობელი.

„მასწავლებლის ეროვნული ჯილდოს“ გენერალური სპონსორია „გუდავაძე-პატარკაციშვილის“ ფონდი, რომელიც პროექტის სპონსორობასთან ერთად გამარჯვებულს ფულადი პრიზის სახით 10 000 ლარს გადასცემს. „მასწავლებლის ეროვნული ჯილდოს“ მხარდამჭერები არიან  საქართველოს განათლების, მეცნიერების, კულტურისა და სპორტის სამინისტრო, „ლიბერთი“ ბანკი, ტელეკომპანია „იმედი“ და „საზოგადოებრივი მაუწყებელი“.

"მასწავლებლის ეროვნული ჯილდო" პირველად 2017 წელს ჩატარდა. მაშინ კონკურსის გამარჯვებული ლანჩხუთის მუნიციპალიტეტის სოფელ ჩიბათის საჯარო სკოლის სამოქალაქო განათლების მასწავლებელი ლადო აფხაზავა გახდა. ლადო აფხაზავა 2019 წლის "მასწავლებლის გლობალური ჯილდოს“ ფინალში, მსოფლიოს 10 საუკეთესო მასწავლებელს შორის მოხვდა.