გორის სამხედრო ჰოსპიტალში საკარანტინო ზონა შეიქმნა

ახალი კორონავირუსის გავრცელების პრევენციის ღონისძიებების ფარგლებში, თავდაცვის სამინისტროს გორის სამხედრო ჰოსპიტალში საკარანტინო ზონა შეიქმნა. სამედიცინო დაწესებულებაში მოთავსებული პაციენტები რეფერალური მომსახურებით გადანაწილდნენ სხვადასხვა კლინიკაში, სამხედრო ჰოსპიტალში კი, საკარანტინო ზონა მოეწყო და ყველაფერი მზადაა იმისთვის, რომ საჭიროების შემთხვევაში, პაციენტები მიიღონ.

„1-ელ მარტს ჯანდაცვის სამინისტროსთან მჭიდრო კოორდინაციით მივიღეთ გადაწყვეტილება, რომ სამხედრო ჰოსპიტალი მოეწყოს საკარანტინო სივრცედ. ჩვენ მივიღებთ მხოლოდ რისკ-ჯგუფში შემავალ პაციენტებს, რომლებსაც მოვათავსებთ იზოლირებულ, ბოქსირებულ და ნახევრად ბოქსირებულ პალატებში. დავიცავთ ყველა რეგულაციას, რაც სამინისტროს აქვს მოწოდებული. ჩვენ მზად ვართ ყველანაირი სირთულისთვის“, - განაცხადა სამხედრო ჰოსპიტალის დირექტორმა დავით ბარლიანმა.

ამ ეტაპზე საკარანტინო ზონაში იმყოფება 4 პაციენტი, 1 სამოქალაქო და 3 სამხედრო, თუმცა კორონავირუსი კვლევებით არც ერთს არ დაუდასტურდა. მათზე დაკვირვება გაგრძელდება. ჰოსპიტალს სრული სიმძლავრით 180-მდე პაციენტის მიღება შეეძლება. მნიშვნელოვანია, რომ ჰოსპიტალს აქვს ცალცალკე კორპუსები და შესაბამისად შესაძლებელი იქნება ყველანაირი სირთულის პაციენტების გამიჯვნა.

საქართველოში კორონავირუსის პირველი შემთხვევა 2020 წლის 26 თებერვალს დადასტურდა. დაავადებული საქართველოს მოქალაქე ქვეყანაში აზერბაიჯანის გავლით ირანიდან შემოვიდა. კორონავირუსის მეორე შემთხვევა საქართველოში 2020 წლის 28 თებერვალს, მესამე კი 29 თებერვალს დადასტურდა.

30 იანვარს ჯანდაცვის მსოფლიო ორგანიზაციამ კორონავირუსი გლობალურ საფრთხედ გამოაცხადა. ჩინეთში პნევმონიის აფეთქება 2019 წლის დეკემბერში დაიწყო. ის გამოწვეულია კორონავირუსის აქამდე უცნობი შტამით.

21 იანვარს ჩინეთმა დაადასტურა, რომ კორონავირუსი გადამდებია. მომხდარის გამო ქვეყნის ორ ქალაქში კარანტინი გამოცხადდა. ჩინეთში საქართველოს საელჩოში კი ცხელი ხაზი მოქმედებს.

მართალია თუ არა, რომ კორონავირუსმა უხანის სამეცნიერო ლაბორატორიიდან გაჟონა? ამ ბმულზე ნახეთ.